معظم الأثمنة ماتغيراتش بالمقارنة مع السيمانة اللي فاتت.. هذو كَاع تفاصيل الأسعار فسوق الجملة فكازا

بحال العادة كل أربعاء، دار سوق الجملة للفواكه والخضر التابع للمجلس الجماعي لمدينة كازا، ليست ديال الأثمنة الخاصة بالمنتوجات الفلاحية اللي كيتباعو بالكَرو، باش يحدد السقف ديال الأثمنة والثمن الأدنى ديالها حسب جودة كل منتوج، وماتكون حتى شي زيادة فهذ الوقت اللي كتعرف البلاد حالة طوارئ صحية بسبب فيروس كورونا المستجد.
بالنسبة لثمن اللحم بالجملة فالباطوار ديال كازا فالثمن ديالو ماعرفش تغيير كبير بالمقارنة مع السيمانة اللي فاتت، لحم الغنمي تزاد بدرهم، ولا يدير دابا فالثمن الأدنى 50 درهم والثمن الأقصى 54 درهم للكيلو، والبكَري نقص بدرهم، وولا الثمن ديالو الأدنى ف53 درهم، والثمن الأقصى 58 درهم للكيلو.
أما الخضرة، فمعظم الأثمنة ديالها استقرات، وحدد السوق الأثمنة ديال الخضرة الأساسية بالكيلوكَرام ف: ماطيشة 80 سنتيم فالثمن الأدنى و2 دراهم فالثمن الأقصى، وخيزو درهم فالثمن الأدنى ودرهم و50 سنتيم فالثمن الأقصى، البصلة 3 دراهم ونص فالثمن الأدنى و5.50 دراهم فالثمن الأقصى، باطاطا 1 درهم ونص فالثمن الأدنى و2 دراهم فالثمن الأقصى، البصلة الخضارية 80 سنتيم فالثمن الأدنى ودرهم و80 سنتيم فالثمن الأقصى.
وبخصوص الخضر لخرى حتى هي نفس الأمر، المكور أو الكرومب كيدير 60 سنتيم فالثمن الأدنى و1 درهم و20 سنتيم فالثمن الأقصى، والكَرعة الخضرة كتدير 2 دراهم فالثمن الأدنى و4 دراهم فالثمن الأقصى، والخيار 1 درهم و20 سنتيم فالثمن الأدنى و2 درهم فالثمن الأقصى، والدنجال درهم واحد و20 فالثمن الأدنى ودرهم و80 سنتيم فالثمن الأقصى، والكَرعة الحمرا 2 دراهم فالثمن الأدنى و4 دراهم ونص فالثمن الأقصى.
أما بالنسبة للفواكه، عرفات زيادة فبعض الفواكف، بينما فواكه أخرى عرفات استقرار، وبالتالي: لافوكا دايرة فالثمن الأدنى 25 درهم، والثمن الأقصى 35 درهم، البانان دبرا داير 8 دراهم الثمن الأدنى و12 الثمن الأقصى، البنان دالبلاد 5 دراهم فالثمن الأدنى و7 دراهم ونص فالثمن الأقصى، الليمون 4 دراهم فالثمن الأدنى و6 دراهم فالثمن الأقصى، والتفاح دالبلاد 2 دراهم الثمن الأدنى و7 دراهم فالثمن الأقصى، والتفاح المستورد 8 دراهم والثمن الأدنى و13 درهم فالثمن الأقصى، والدلاح درهم أقل ثمن و2 دراهم و30 سنتيم فالثمن الأعلى.