الفقي بن صالح.. وكيل الملك أمر باعتقال راقي شرعي دخل عندو 17 مرا فعز حالة الطوارئ الصحية

أمر وكيل الملك فالمحكمة الابتدائية فالفقي بن صالح باعتقال راقي شرعي، متابع بتهم كتتعلق بخرق حالة الطوارئ الصحية والنصب والاحتيال، بعدما لقاوه مدخل 17 مرا لعندو، فعز أزمة فيروس كورونا المستجد.
وتمت متابعة المساعدة ديال الراقي (31 عام) بنفس التهم فحالة صراح، بينما تعطات تهمة "خرق حالة الطوارئ" فقط للعيالات اللي جاو عند الراقي، وحتى هوما تابعاتهم النيابة العامة فحالة سراح.
وتحددات أول جلسة لمحاكمة الراقي والمساعدة ديالو نهار الاثنين 22 يونيو، بينما غيتم تحديد موعد آخر لمحاكمة العيالات اللي جاو عندو من بعد.
وولبارح الأربعاء، تم توقيف الراقي الشرعي من طرف البوليس، التابعة للمنطقة الإقليمية الفقي بن صالح، وشدوه متلبس باستقبال 17 مرا عندو للدار، بعدما تشكاو الجيران من أعمال الشعوذة اللي كيدير، والتبرزيط ديالو والصداع ديال تراتيل "الرقية الشرعية" اللي طالقها بالجهد.