صحاب البيران والكباريات وليبواط كاعيّين مغاديش يحلُّو.. ومهنيين ل"كود": عيينا وحنا صابرين لكن الصبر تقادا وكيفاش القهاوي اللّي كيجيو ليهوم الناس بزاف يخدمو وحنا لا؟

صحاب البيران والكباريات وليبواط كاعيّين حقاش مغاديش يحلو. البارح مصدر موثوق من وزارة الداخلية أكد ل"كود" أن هاد المحلات مغاديش تخدم حتى لإشعار لاحق. الداخلية عارفة علاش بطبيعة الحال وتفكر في صحة المغاربة اكثر من هادشي ديال الشراب.
عدد من المهينين فهاد القطاع هضرات معاهوم "كود"، وكلهوم أجمعوا على أنهم عياو بالصبر ودبا مابقاش قادين يزيدو يصبرو اكثر من هادشي. أحد قال ل"كود" مستغربا: "كيفاش المقاهي اللّي كيجيو ليهوم الناس بزاف غادي يخدمو وحنا لا؟. وزيد عليها لقهاوي كيبداو مع 8 ديال الصباح. وحنا حتى لعشية".
وأضاف قائلاً: "وراه خاص الجهات المعنية تعرف بأنه وخا غادي نحلو راه مكاينش اللي غادي يجي، والناس غادي يكونو قلاليل بزاف، وحنا مستعدين نفرضو على الزبناء الإجراءات الاحترازية التي طالبت بها السلطات المختصة، وهاد القطاع فيه الناس بزاف ومرتبط بالسياحة الداخلية، وتضرينا بزاف ومابقيناش قادين انزيدو".
وكان مصدر موثوق من وزارة الداخلية قد أكد أمس ل"كود" أن "التدابير المعلن عنها في إطار المرور إلى المرحلة الثانية من مخطط تخفيف الحجر الصحي، ابتداء من الساعات الأولى من يوم الخميس 25 يونيو 2020، والمتعلقة تحديدا بالسماح لبعض المحلات باستئناف أنشطتها وتقديم خدماتها بعين المكان، وفق الشروط المحددة، لا تشمل الحانات والملاهي الليلية والمطاعم التي تقدم عروضا موسيقية، والتي ستبقى مغلقة حتى إشعار آخر.