خاص.. حملة بونظيف متواصل فوزارة الثقافة والموجة قريب تضرب مدير الديوان اللّي مداير والو

الحملة اللّي داير وزير الثقافة والاتصال منذ تعيينه مزال متواصلة. فقد علمت “كود” أن هاد الحملة وصلات لعدد كبير من المقربين للوزير. وحسب مصادرنا، فإن الوزير قرر يتخلى على عدد من الناس اللّي معاه فالديوان. ومزال غادي تشمل بعض الأطر اللّي كبرو بزاف ومابقاوش قادين يعطيو شي حاجة للوزارة. الوزير باغي يدخل شباب قوي وعندهوم الكفاءات.
الوزير الحركي النشيط فالحكومة قرر يبدل “صطاف” ديالو. وحسب المصادر نفسها، ل”كود”، فإن الوزير اكتشف أنه الفريق ديالو غير كالس ومعندو حتى شي دور فعال، سيما بداخل ديوان الوزارة ديال الثقافة. الوزير شاف راسو خدام غير بوحدو من انهار جا لهاد الوزارة حتى نسا عائلتو وكولشي يشرح مصدر “كود”.
مصادر “كود” كشفات على أن الوزير مراضيش على العمل اللي كان غادي بيه الفريق ديالو. هادشي علاش بدل “صطاف” وداير شويا ديال التغربيل. وتوقعات نفس المصادر باش يبدل حتى مدير الديوان اللي حاطو تما العنصر والرباعة ديالو.
هاد مدير الديوان معندوش علاش يحشم. وقالت مصادر “كود” أن هاد مدير الديوان عاجبو غير المكتب والطونوبيل ديال الدولة وبلا فايدة ومعندوش مع الخدمة كاع. وغير كون سبع وكولني ماشي يحساب ليك راك اكثر من الوزير. ونوض جمع راسك شويا ونوض تخدم وباركة متحارب فالوزير ديال حزبك راه عاقو بيك.