مابقى والو على خروج الصحافي المهداوي من الحبس.. ومراتو ل"كود": كنحس بفرحة كبيرة ماقادراش نوصفها.. ونتمناو هذشي يكون آخر الأحزان

من بعد ما دوز مدة عقوبتو السجنية، مابقاش بزاف على خروج الصحافي حميد المهداوي مدير موقع بديل من الحبس، بحيث تقرر خروجو ف20 يوليوز القادم، مراتو بشرى الخنشوفي ماقدراش تخبي فرحتها بهذ الخبر، وكتشوف بللي خروج المهداوي غادي يكون ميلاد جديد ليها ولوليداتهم يوسف وسلاف.
فحديثها ل"كود"، قالت مرات المهداوي "هذا إحساس زوين اللي كنحس بيه وصعيب نعبر عليه !! حنا فرحانين وكنا كنتسناو هذ اللحظة بفارغ الصبر، كانت فواحد الوقت كتبان لينا عمرها ما توصل، لكن الحمد لله".
وزادت، فوصفها للمعاناة اللي مرات منها هي ووليداتها بسبب غياب المهداوي "فعلا صبرنا وتآدينا وعانينا على جميع المستويات، ولكن دابا صافي، وصلنا لهذ النهار، وكنتمناو يكون آخر الأحزان لينا ولكَاع الصحافيين فهذ البلاد".
وحول سؤال "كود" لزوجة المهداوي على ما إذا كان غيستمر فمزاولة المهنة ديالو كصحافي بعد خروجو من الحبس، كتقول الخنشوفي "مانقدرش نجاوب صراحة على هذ السؤال، وهنا القرار كلو كيرجع ليه، ونتمناو الخير".
وكان المهداوي تعتقل ف21 يوليوز 2017، على خلفية "الدعوة إلى المشاركة فتظاهرة غير مرخصة" فالحسيمة، وتحكم عليه بعام دالحبس، وكذلك تمت متابعتو بعد هذشي بتهمة "عدم التبليغ عن جناية تمس بأمن الدولة"، أدين من خلالها ب3 سنوات حبسا نافذا وغرامة ديال 3 آلاف درهم، وهذشي قبل ما يتم ضم الملفين وتطبيق العقوبة الأشد، اللي كتتمثل فالحبس ل3 سنوات والغرامة.