رمضان فالدار. رفيقي "أبو حفص" ل"كود": هاد الشهر كلعب بلايستيشن مع ولادي وكنتعاونو انا والمادام فالشغال وكندير الرياضة.. وأنا عندي مناعة من الحجر الصحي حيت ديجا دوزت الحبس

كل يوم "كود" كتسول فنانين ومشاهير ومؤثرين على كيفاش كيدوزو نهارهم مع الحجر الصحي فرمضان.
اليوم معانا الباحث فالدراسات الإسلامية، محمد عبد الوهاب رفيقي، الملقب ب"أبو حفص"، اللي قال فحديثو مع "كود" بللي ماعندوش نشاط موحد، وكيتعمد ينوع من الأنشطة ديالو ويدير أعمال مختلفة ويبدل حتى التوقيت ديالها باش ما يقنطش.
وزاد رفيقي كيقول، فحديثو على الأنشطة اللي كيدير: "كنعاون فالدار، كنقوم ببعض الأشغال المنزلية، كندير حصة رياضية من أجل تحريك الجسم والدم، وكنمارس هذ الرياضة فمساحة ضيقة جدا، تنخصص وقت للكتابة والقراءة، وكنخصص وقت طويل للتواصل الاجتماعي ومتابعة آخر الأخبار والمستجدات وممارسة التوعية عن طريق الفيديوات والمنشورات والفيديوات واللايفات والتي كتكون شبه يومية، وايضا التفاعل مع الناس والإجابة على تساؤلاتهم، لأننا فأزمة تحتاج التواصل مع الناس، بالإضافة لإثارة بعض القضايا في مجال تخصصي المرتبطة بالشأن الديني ومحاولة تحريك العقول".
وبالنسبة الحوايج الأخرى اللي كيدير رفيقي، "عندي أنشطة أخرى أشاركها مع الأسرة وهي متنوعة، هذي يوميا ضروري حصة بلييستيشن مع الأطفال، بارتشيزي أحيانا كلعبوها بشكل جماعي، كنتفرجو بشكل جماعي مع الأسرة على فيلم، أو كنتفرج بشكل فردي على عدد من السلاسل الأجنبية أو المحلية أو العربية اللي كنتابعها فهذا الشهر، الوقت عندي مملوء مزيان لدرجة ماكالقاش الوقت كيفاش نزاول أنشطة أخرى كثيرة"، على حساب كلامو.
وقال بللي الأنشطة المتنوعة كتساعد فالتغلب على الملل، وهذشي اكتسب فيه تجربة ومناعة من أيام اعتقالو، وبالتالي "ماعنديش أدنى مشكل مع الحجر أو الجلوس فالدار، حيت عندي تجربة طويلة جدا فهذ الباب، دوزت ما هو أقصى وما هو وأسوء وتعلمت نتأقلم، وكنحاول نعتبر أن هذي هي الحياة كلها والدنيا كلها، وبالتالي هذاك هو العالم اللي كاين وخاصك تستعمل جميع الإمكانيات اللي فيه"، كيف قال رفيقي.