لابوراطوار ديال التحاليل فسيدي سليمان ساد ففترة الحجر الصحي فرمضان ومواطن ل"كود": المادام مريضة وماستطعاتش تدير التحاليل وحالتها تدهورات

لابوراطوار ديال التحاليل الوحيد اللي كاين فسيدي سليمان ساد، وما غيحل حتى يسالي الحجر الصحي اللي دارو المغرب للحد من انتشار فيروس كورونا المستجد.
لابوراطوار عامل إعلان فالباب ديالو، قايل من خلالو بللي "نظرا للحالة الوبائية وحفاظا على صحة الموظفين والمرضى فإن المختبر سيستأنف عمله عند انتهاء الحجر الصحي وشكرا".
المشكل أن لابوراطوار هكذا كيعرض حياة مجموعة من المواطنين للخطر، بحكم أنه غيخصهم التحاليل كوسيلة أساسية لتشخيص الأمراض اللي كيعانيو منها، وهذشي علاش الأطباء فالمدينة ولاو يخرجو الأدوية الخفيفة للمرضى بلا ما يديرو التحاليل، وبلا ما يشخصو المشكل اللي عندهم بدقة.
مجموعة من المواطنين استنكرو هذشي، ومنهم مواطن اللي كتعاني مرتو من مشكل جلدي، كيقول: "مشيت انا والمادام لعند طبيبة دالجلد الاثنين اللي فات، حيت كانت كتعاني من شي حكة فالجلد ديالها، ومن يعد ما دوزات ليها قالت ليها ضروري خاصها التحاليل، وتأسفات لينا، وكتبات ليها أدوية مخففة".
وزاد كيقول، فحديثو ل"كود"، "لبارح السبت الحالة ديالها تدهورات بزاف، مشينا للمستشفى الإقليمي وعطانا التحاليل اللي غيخصنا نديرو، منين مشينا باش نديروها لقينا بللي لابوراطوار فعلا ساد".
وحاولات كود تتصل بهذ لابوراطوار باش تاخد إفادتو فالموضوع، لكن التيليفون صونا بلا جواب.