بلا تخطيط وبلا تنسيق وبلا تفسير من وزارة الصحة .. غير جات وبغات متطوعين تجرب فيهم ليقاح "كورونا".. ال"CGEM" بجهة فاس مكناس لصحاب الشركات: قيدو سميات اللّي بغا يشارك فالتجارب

شوهة تابعة شوهة فوزارة الصحة. في الوقت اللّي هاد الوزارة عندها مشكلة كبيرة فالتواصل مع الرأي العام الوطني في تدبير جائحة "كورونا"، ناضت قالت غادي تدير اجتماع بحضور والي جهة فاس مكناس لإطلاق الحملة ديال التلقيح ضد "كورونا"، اللّي غادي تبدا فاتح شهر شتنبر المقبل.
الاتحاد العام لمقاولات المغرب بجهة فاس مكناس حتى هو انخرط فهاد العملية بلا ميشرحو للناس شنو هو هاد اللقاح. أمور علمية غايبة عليه بتاتا وكولشي تالف. الCGEM صيفطات البارح إيميل لصحاب الشركات باش يوجدو لائحة ديال المستخدين اللّي بغاو يديرو اللقاء، واعطاهوم آخر مهلة هي اليوم مع ال6 ديال لعشية.
والي الجهة سعيد ازنيبر عرض على الاتحاد العام لمقاولات المغرب ديال فاس باش تحضر لاجتماع سيعلن فيه المدير الجهوي لوزارة الصحة، المهدي البولطي، عن إطلاق الحملة ديال التلقيح اللّي غادي تبدا فاتح شتنبر.
هاد اللقاح ديال "كوفيد19″، حسب مراسلة الCGEM صوباتو الصين، والحكومة المغربية وقعت معها اتفاقية الأسبوع الماضي لكي تنجز مجموعة من التجارب باش يسمح للشعب المغربي يستفد من اللقاح، بطبيعة الحال من بعد ما يتوافق عليه من طرف الهيئة العلمية المختصة.
إلى حدود اليوم اللقاح في المستوى الثالث. وحسب البروتوكول الدولي الذي وضعته المنظمة الصحية العاليمة فيجب مشاركة متطوعين في التجارب ، ومن خاصهوم متابعة صحية خاصة.
الاتحاد العام لقواملات المغرب فالمراسلة ديالو، دعا صحاب الشركات: "نظرا للعدد القليل من المقاعد التي تم إعطائها للجهة أدعوكم إلى دعوة جميع موظفي الشركات المنتمين لCGEM اللي بغاو تجارب هاد اللقاح يصيفطو إيميل على السادسة من مساء اليوم".
وأوضح فهاد المراسلة أن الناس اللّي يستجلو ضروري يكون عندهوم اكثر من 18 العام ومعندهمش أمراض مزمنة.