غريب. علاش ما عاقبوش "لكابيستون": لقاو فيه 35 مخالفة دالكمامة وخلصوها على الزبناء. راه المخالفات مسؤولية الريسطو

البارح فمطعم "لوكابيستون" المعروف فالعنق فكازا دخل البوليس. لقاو مخالفات ديال الكمايم. وفق شهادات اللي كانو الداخل كاين 35 حالة خلص كل واحد فيهم 300 درهم.
طبعا اللجنة غادية تكون سجلات مخالفات اخرى كتهم المطعم. اللي كيعرف هاد البلاصة غادي يبان ليه باللي التباعد صعيب بزاف يحتارموه.
دابا المطعم خلص على اللي خلصو المخالفة وفق شهادات ديالهم. المشكلة فين كاينة؟ علاش لحد الان ما تعاقبش المطعم. كيفاش فيه هاد المخالفات وخدام هانية.
عقلتو نهار كان هاداك عامل انفا وجا لهاد المعطم وغيرو ديال برادة ولعلج؟ ديك الليلة كان العقاب. عاقب المطعم. العامل مسكين طيروه حقاش دار خدمتو.
كليان هاد المطعم كيعرفو اوربا مزيان. عارفين ان اي مطعم فاي بلاد اوربي فيها اجبارية الكمامة فالطيراس باش تسالي الماكلة او خاصك ديرها حتي تبرك فبلاصتك٬ ولا ما عندكش ما تدخلش. ايلي ما درتيهاش يجي عندك مول المطعم ولا السيرفور ويخرجك. يعني ان الكابيسطون كان خاصو يطبق القانون وباش وقعات مخالفات خاص يطبق فيه القانون.