شوهة كبيرة كدوز فدوزيم.. الاشهار داخل الاخبار وواحد المدير بالنيابة كيقتل فالقناة

شوهة كبيرة كدوز فدوزيم هاد الأيام وهي فقرة في الاخبار عنوانها "صنع بالمغرب" الفكرة ما بيهاش غير هي تحولات للإشهار والتبزنيز المفروش.
البارح دوزو نموذج ديال حليب سنترال لي قاطعوه المغاربة في حملة المقاطعة، دوزوه على أساس أنه صنع بالمغرب، بالله عليكم واش الشركة مغربية؟ عيب يكون هادشي فقناة عمومية وعيب ما تدخلش الهاكا فهادشي.
على هاد الحساب راه كل الماركات العالمية كتنصع في المغرب وخاصها تدوز تا هي.
دابا لي ضبر على شي تبزنيسة يدوزها.
مصدر من داخل القناة أكد ل"كود" أن هادشي مكانش في عهد سيطايل لي كانت زامطة قسم الاخبار بمهنيتها وصرامتها.
الآن الوضع مختلف، مدير الأخبار بالنيابة طامع يولي مدير ديال بصح، وداير رجل مع المدير العام ورجل مع النقابة، الى تعين مدير يخدم وإلى جا شي حد آخر يدير العصى في الرويضة.. هذا هو شعاره بحسب مقربين منه ومن نقابة دوزيم.
دابا ا سي المدير غير راعي شوية ديال المهنية لي بناوها اللي قبل منك بلا متريب الخيمة وإلى حسيتي براسك معندك ما تعطي احسن ليك دير "دي في دي" كيف دارت مديرتك.