واش كيجمعو حساب نهار الأحد اللي مكتكونش فيه الخدمة.. الإصابات بكورونا فكازا سطات نهارات الاثنين قليلة وعلى غير العادة.. ها شحال ديال الحالات كيكون فالاثنين وها شحال فباقي الايام

فكل اثنين، كازا سطات مكتسجلش إصابات كثيرة بفيروس كورونا المستجد، فالوقت اللي الإصابات فيها فالعادة كيفوتو سقف 2000 حالة يوميا، والجهة كتبقى هي اللولة وطنيا من حيث الإصابات الجديدة بالفيروس دون منازع، بسبب كثافتها السكانية المرتفعة.
بطلة خفيفة على نشرة كورونا اليومية خلال أيام الاثنين، كيمكن الاستنتاج أنه فعلا هو اليوم الوحيد اللي الإصابات فيه فهذ الجهة كتكون منخفضة بزاف، على غير العادة، وكتتحدد فالمئات فقط عوض الآلاف، لدرجة أنه كيمكن تفوت كازا سطات شي جهة خرى فالحالات، أو تتساوى معاها، وهذشي مكيوقعش فسائر الأيام الأخرى.
وهذي ليست ديال العشر اثنينات الأخيرة والإصابات المنخفضة اللي سجلاتهم فيها كازا سطات:
الاثنين 16 نونبر: 630
الاثنين 9 نونبر: 1177
الاثنين 2 نونبر: 864
الاثنين 26 أكتوبر: 880
الاثنين 19 أكتوبر: 651
الاثنين 12 أكتوبر: 529
الاثنين 5 أكتوبر: 674
الاثنين 28 شتنبر: 542
الاثنين 21 شتنبر: 495
الاثنين 14 شتنبر: 518
وهذشي فالوقت اللي الإصابات مرتفعة بزاف وبشكل مخيف فباقي الأيام الأخرى فكازا سطات، ناخدو آخر أسبوع على سبيل المثال دون احتساب الاثنين:
الأحد 15 نونبر: 1492
السبت 14 نونبر: 2254
الجمعة 13 نونبر: 2179
الخميس 12 نونبر: 2387
الأربعاء 11 نونبر: 2264
الثلاثاء 10 نونبر: 2381
وبعملية حسابية بسيطة، يمكن نحددو معدل الإصابات اليومي بفيروس كورونا فكازا سطات فالإثنينات العشر ف696، بينما كيتحدد معدل الإصابات اليومي فالأيام الأخرى دالسيمانة اللي فاتت (دون إثنين) ف2160 إصابة.
وكيمكن للملاحظ يرجح هذ النقص فعدد الإصابات فالإثنينات لكون أن هذ النهار يمكن يكون هو اليوم اللي كتجمع فيه المديرية الجهوية للصحة الإصابات اللي كيتسجلو يوم الأحد، وبحكم أنه فالأحد أغلب المرافق العمومية مكتخدمش، أو كتخدم بشكل قليل، فالتحاليل اللي كتدار هذ النهار كتكون قليلة، وبالتالي أوطوماتيكمون الإصابات كيكونو ناقصين.
باش تسول فهذ الإطار، "كود" حاولات تتواصل مع نبيلة الرميلية، المديرة الجهوية للصحة فجهة كازا سطات، وجوج مسؤولين فالمديرية، لكن الهاتف ديال هذو كاملين صونا دون جواب.