سلفي متطرف باغي يرد سوس للجاهلية وكينشر ثقافة الإرهاب بالأمازيغية.. والفنان أسلال: وعطينا تيساع – فيديو

سواسا ناضو لواحد السلفي متطرف طاح على يوتوب وبدا يكفر فالفن ف سوس. هاد المتطرق الملقب ب"أبو عمار"، جايب سميتو من المشرق وطبعا، ماشي غير السمية، كولشي جايبو من المشرق.
هاد المتطرف كينشر الارهاب بالشلحة ودار أزمة كبيرة وسط الفنانين ف سوس، دار الفتنة، وكاينا مطالب باعتقاله لأنه "خرج على رزق ديال عدد من الفنانين بسب الكلام الجريح لي دار هاد السلفي المتطرف ف حقهم وكيحرض ناس ضدهم" وفق شهادات خداتها "كود" من سوس.
دبا هاد الحقير هجم على فنان معروف هو سعيد اوتاجاجات، هاد الفنان رد عليه وكلاشاها ولكن المتطرف باقي كينشر السموم ضد الفن فسوس.
هاد المتطرف كيدير فيديوها بحرية وقال بلي الغناء حرام، هادشي تضررو منو بزف الفنانين فسوس. الفنان اوتاجات سبق رد عليه وقال بلي :"الاسلام الامازيغي فيه الاعتدال والتصوف والمعقول وكينين فنانين دارو الدعوة والموعظة بالشلحة ونشرو اركان الاسلام بالغناء".
هاد المتطرف ما خلا تا شي فنان ماجرحوش ودار الشيطنة، قال شي امور خطيرة ومعليهش رقابة لأنه كيدير فيديوهات بالشلحة وكيستغل الحاجة ديال الناس باش يدوز مساجات متطرفة.
هاد المتطرف، وفق مصادر "كود"، خصو يتشد لأن ضرب ثقافة سوس ضرب ثقافة السلم ، وباغي ينشر الكره والحقد والارهاب.
الفنان الكوميدي المشهور ف سوس رشيد اسلال، قال ليها بعبارة واحدة :"وا عطينا تيساع".
فنان مبغاش يقول سميتو، قال ل"كود" :"هذا قنبلة موقوتة الله يحفظ منو".
وحسب مصادر "كود" فإن هاد ابو عمار مع الشهرة ديالو بدا كيبريكولي فالاعراس و المناسبات، و علم الله اشنو كينشر بين الناس تما فاعماق البوادي فظل غياب الرقابة.
فنانين اخرين بحال الحسين الباز و غيرو حاولو انهم يدافعو على المهن ديالهم و على ثقافتهم ولكن الفكر الظلامي كان ديجا غرس البذور ديالو بين الساكنة، خصوصا ملي بدا هاد المتطرف ولي معه كيديرو "مبادرات" انسانية ف مناطق نائية مهمشة، و تاحد ماعارفش شكون كيمولها ولا شنو لي مطلوب من الناس تما يديروه كمقابل.
طبعا شباب المنطقة حاولو شحال من مرة يتصداو لهاد المصيبة لي باغي يدير لينا الفتنة فالبلاد ولكن ف كل مرة كان كيخرج و يشيطنهم و يلعب دور الضحية و يزيد يجمع فالاتباع..
فنان آخر هضر مع "كود" قال :"الفنانة تبعمرانت سنوات هادي و هي كتحذر الناس من الفكر الظلامي و تاهي كانت من بين الناس لي استهدفوههم هاد الفكر الظلامي"، مضيفا :"واش الدولة دايرة عين ميكة على هاد المتطرف، و كل نهار كيتزادو الأتباع ديالو و كيوصلو لمئات آلاف المشاهدات فظرف وجيز الشيء للي كيشكل خطر على البلاد، لأن بهاكدا كتشكل قنابل موقوتة فواحد المنطقة لي قريبة للصحراء و هادشي لاقدر الله يقدرو يستاغلوه فئات بغاو الخدمة ف البلاد".
https://web.facebook.com/watch/?v=3078705605582168