ايه بصح المغرب تطور فبزاف ديال المجالات فهاد العشرين العام لخرا ! و لكن الثروة البشرية لي هي اهم ثروة مازال جزء كبير منها غارق وسط الجهل و الفقر و الخرافة ! داكشي علاش صعيب تزيد القدام

حتى واحد بعقلو ماغادي ينكر بلي المغرب خلال هاد العشرين عام لي فاتت تزادو فيه بزاف ديال الحوايج مزيانين ! مستوى المعيشة تحسن بالنسبة لبزاف ديال المغاربة و هادشي ماتحتاجش الارقام باش تشوفو ! لي عاش فالتمانيناث و التسعينات غايكون شاف مظاهر الزلط و الجوع لي كانت ديك الوقت ! من ناحية البنية التحتية المغرب تطور اليوم عندنا شبكة طرق سيارة مهمة ، عندنا خطوط ديال القطارات و الخط الفائق السرعة و محطات بجودة عالية، المغرب تطور فمجال الطاقات المتجددة و بالاخص الطاقة الشمسية و الريحية … و طبعا حتى مناخ الاعمال زيان و بزاف ديال الشركات الكبرى فحال بوجو، رونو ، سيوز ختارو المغرب كوجهة الاستثمار و خلق فرص الشغل !
بصح المغرب لادمرتي فيه و ضربتي تامارا و بغيتي توصل غادي توصل ! انا كبنت الطبقة الكادحة ! خريجة المدرسة العمومية سافرت و شفت دول افريقية اخرى اغنى من المغرب و عندها ثروات حقيقية فين يبان الفوسفاط و جوج بحور نقدر نقول بلي بصح المغرب قدر يتقدم فبزاف ديال المجالات و يولي قاطرة فافريقيا !
ولكن ! المشكل الكبير اليوم فالمغرب هوا انه السرعة باش كايزيدو المشاريع الكبرى ماشي هي نفس السرعة باش كايتطور الشعب ! و الهوة الاقتصادية و الطبقية غادية و كاتوساع بين عباد الله، علاش ؟ الاسباب بزاف فيها ماهوا اقتصادي و ما هوا اجتماعي و ماهوا سياسي ! حيت لاماكانش رغبة سياسية راها ماكاين والو ! و لكن اهم سبب فرأيي هوا المدرسة لي يمكن اعتبارها وسيلة ترقي طبقي ماتت ! المغرب فيه بزاف ديال الناس مازالين غارقين وسط الخرافة و الجهل و الكالاخ ! الدولة ماباغاش تفصل بين الدين و السياسة ومخلية شي فشي فواحد الغموض ماشي فصالح الدولة بحد ذاتها ! القوانين واخا تطورات و لكن ماشي بالشكل الكافي لي يخلي المغرب يكون بلد منفتح على الاختلافات و الحريات ! هادشي كايخلينا ناكلو العصا قدام المنظمات الدولية و كايحرم المغرب من المصداقية ديالو ! مازال المثليين كاياكلو عندنا العصا فالزناقي و جوج ديال الناس يقدرو يخرجهم المخزن من دارهم ملويين فيزار بيض كي اللفت حيت ديكلاراو بيهم الجيران ! كاين التحرش و مازال المراة كاتحس براسها كائن غير مرحب به فالفضاء العمومي ! مايمكنش تمشي فين بغات ! وقت مابغات و تحس بالأمان ! مازال باش المرا تقدر تندامج فالفضاء العام خاصها تلبس طويل و “تستر” حيت لاماتستراتش اي واحد كايعطي لراسو الحق يقيسها و يتبسل عليها ! مازال عندنا بعض خوامجية و سلفيين كايكفرو عباد الله و كايدعيو للكراهية و الظلامية ! قنابل موقوتة تقدر فأي وقت دير شي مصيبة كحلة …هادشي واخا يبان بسيط لشي بعضين و لكن راه كايشكل اعاقة لبزاف ديال القطاعات فحال الخدمات و السياحة ! لاش غايجي عندك سائح نتا باش يلصقو فيه السعاية و يبيعو ليه النصابة صندالة يوسف بن تاشفين بستيف الف ديال و يضربو مول الطاكسي فشي كورسة بمياتدرهم تاينقز ! وفاللخر مراتو يخورها شي مكبوت ؟ مايمكنش !
هاد الكونطراسط بين جوج “مغربات” كايخلق واحد النوع ديال التشوه فالصورة لي باغا الدولة المغرب يبان بيها و بين الصورة الحقيقية ديالو ! الانجازات الاقتصادية المهمة و التطورات فالبنية التحتية و مناخ الاعمال لامارافقهمش واحد النضج شعبي راه فحالا كاكتب الما فالرملة حيت فاش كاتجي تستف الثروات ديالك كاملين شنو كاتكون اهم ثروة فأي بلاد ؟ الثروة البشرية !
الثروة البشرية لي خلات اليابان الدولة الفقيرة طبيعيا تكون من القوى الاقتصادية الكبرى عالميا ! و جمهورية الكونغو الديموقراطية لي تعتبر من اغنى البلدان من ناحية الثروة الطبيعية ( الذهب و اليورانيوم و النحاس و و و ) تتصنف فمؤخرة الدول !