انفراد. بنكيران ضد انعقاد المجلس الوطني للحزب. طلب من الازمي باش ما يتعقدش وحتى لا ما خداوش برأيو ما غاديش يحضر ليه و"كود" تنشر السبب

علمت "كود" ان عبد الاله بنكيران رئيس الحكومة السابق الامين العام السابق لحزب العدالة والتنمية ضد فكرة انعقاد المجلس الوطني لحزبو يوم الاحد المقبل 27 دجنبر 2020.
هاد الاجتماع كان دعا ليه المجلس الوطني للحزب وامانتو العامة بجوج. وتبرر بان هاد الدورة الاستثنائية "تندرج في سياق مناقشة آداء الحزب بخصوص التطورات السياسية المرتبطة بقضية الوحدة الترابية للمملكة ومغربية الصحراء، وكذا مستجدات القضية الفلسطينية".
بنكيران وفق مصدر مقرب منو ل"كود" وجه طلب شفهي ادريس الازمي الادريسي رئيس المجلس الوطني فهاد الخصوص وطلب منو عدم عقدو. ودابا اكيد الازمي غادي يتشاور مع الامين العام ويبثو فالطلب.
بنكيران وفق مصدر "كود" بانت ليه باللي "الظروف ماشي مجتمعة" لعقدو وباللي "ماشي هادا وقتو" وباللي حتى ولو ما دارش برأيو راه "ما غاديش يحضر ليه".
الرجل القوي فالحزب واخا تعرض لضربات من ناسو اللي شادينو دابا٬ كيشوف انو خاص اولا "الضباب يتبدد" بخصوص تبعات موضوع عودة العلاقات المغربية الاسرائيلية وتوقيع المغرب من خلال رئيس الحكومة اللي هو الامين العام لحزب العدالة والتنمية: العثماني٬ على اتفاق ثلاثي مغربي امريكي اسرائيلي.
بنكيران كان دافع على العثماني اللي هاجموه شي ناس منو واللي طالبو بابعادو عن تسيير الحزب واسناد المهمة لسليمان العمراني.
رئيس الحكومة السابق شاف باللي الامور بردات بعد كلمتو وباللي خاص الوقت عوض اجتماع فوضعية فشي شكل تقدر تعطي قرارات فشي شكل.