الخبرة الجنية لإثبات نسب البنيتة نور من المحامي الطاهري.. المحامية الكَلاف ل"كود": المحكمة اقتنعات بالإثباتات اللي قدمنا ليها.. وللطفلة كل الحق فالحصول على النسب

"انتصار محكمة الأسرة فكازا لليلى وبنتها نور، ضد المدعى عليه المحامي محمد الطاهري اللي رفض الاعتراف بالبنت ديالو، وقرارها بإعمال الخبرة الجينية، ماجاش بسهولة، بل بعد جلسات طويلة عرفات تطميم وإهدار للوقت"، كيف كتقول المحامية عائشة الكَلاع، عضوة دفاع الطرف المدني فهذ الملف.
وزادت الكَلاع، واللي هي أيضا محامية بهيئة الدار البيضاء، أن هذ القرار جا بعد مقال افتتاحي وضعاتو الأم ليلى، واللي خلا المحكمة تقتنع، بالإضافة لكل الإثباتات الأخرى والوثائق والرسائل والنقاش القانوني اللي تثار و اللي وضعوها الدفاع أمامها.
وقالت، فتصريحها ل"كود"، أنه "حنا تبنينا الدعوة باعتبارنا حقوقيين وثانيا فاتصال مع أم الطفلة، بتنسيق مع جمعيات تبنات الملف، ومن أجل إحقاق الانصاف والحق ليس هناك إشكال إلى كنا غنموصلو للحقيقة القضائية"، على حد قولها.
وأكدات أنه كاينة علاقة خطبة بين المدعى عليه وأم الطفلة، الشي اللي نتج عليه حمل شرعي، و"هذي علاقة شرعية غير موثقة كتسمح للطفلة الحصول على النسب، وهذشي أكدوه شهادات الشهود، وكخطوة أولى خاص الخبرة الجينية، والقاضي من حقو برجع لشنو كيقول العلم"، حسب قول الكَلاع.
وكشفات أن المدعى عليه جا مرة وحدة للمحاكمة، قال فيها أن القضية "معدة من طرف المحكمة سلفا"، و"عدم حضورو كان سبب دالتمطيط" حسب الكَلاع.
وقرار المحكمة جا فالجلسة الأخيرة اللي كانت اليوم للاثنين، والجلسة المقبلة غتكون ففاتح مارس.