23 معلومة كتهم الفاكسان فالمغرب.. خبراء التلقيح: ها شكون اللي خصهم يبداو بيه وهاد الحالات ممنوع يديروه وها شحال خاص للناس اللي تفاكسيناو باش يوصلو للمناعة

الفاكسان هو الحاجة الوحيدة لي تقدر تمنع انتشار فيروس كورونا، المغرب معول عليه باش الصحة العامة ترجع كيف كانت. وبالتالي خاص تعميم اللقاح على فئات واسعة من المواطنين.
أسئلة كثيرة على اللقاح جاوبو عليها خبراء مغاربة مختصين في التلقيح، هاد الأجوبة نشرتها الجمعية المغربية الأمراض التعفنية لدى الأطفال والتطعيم، ف واحد دليل علمي سبق نشراته "كود".
وبمناسبة توصل المغرب ب2 مليون جرعة من فاكسان أسترازينيكا، "كود" تعيد نشر أهم ما جاء في الدليل العلمي حول التلقيح:
1/ الفاكسان خصو جوج جرعات بفاصل 21 يوما.
3/ كاينا آثار جانبية عادية بحال الآم والتورم والتهيج في موقع الحقن. وممكن يكونو اثار بحال السخانة والرعشة والتعب والصداع.
4/ الفاكسان مهم بزاف للأشخاص لي مراض بالسكري وامراض القلب والرئة والسمنة. لأن هادو اذا تقاسو بالفيروس غايعانيو بزاف.
5/ اذا درتي اللقاح خصك تسنى 15 دقيقة أو 30 دقيقة، باش تأكد أنك بخير..
6/ مخصكش دير لقاح آخر باستثناء الجرعة الثانية من اللقاح لي كنتي بديتي. وتسنا 28 يوم على الأقل بعد الجرعة الثانية.
7/ واخا يدار الفاكسان خاص الالتزام بالكمامة والتعقيم والاجراءات الاحترازية حتى تبان الفعالية ديال الفيروس.
8/ الجرعة الأولى مكتعنيش المناعة ضد الفيروس، ممكن تصاب به (وقعت حالة فالمغرب مثلا، رجل الاعمال ايت منى تقاس بالفيروس واخا دار الجرعة الاولى).
9/ لقاح الانفلونزا مكيحميش من كورونا، واخا ديرو خصك دوز اسبوعين ودير الفاكسان ديال كورونا.
10/ كاينين حالات مغاديش يديرو التلقيح ضد كوفيد مؤقتا وعندها الأسباب التالية:
أولا الحمل بسبب نقص البيانات العلمية في الوقت الحاضر.
ثانيا مرض كوفيد 19 بتاريخ أقل من 3 أشهر (اذا كنتي تصابتي بكورونا أقل 3 أشهر من بدء التلقيح مخصك ديروش).
ثالثا — الحساسية المفرطة أو رد فعل تحسسي خطير (أرجية) للقاح سابق يحتوي على مكون موجود أيضا في اللقاح الجديد. مخاصش تعطى الجرعة الثانية لأي شخص عانى من الحساسية المفرطة بعد أخذ الجرعة الأولى من هذا اللقاح.
رابعا– في حالة الإصابة بمرض حاد يستحسن تأجيل اللقاح إلى أن يتم حله.
11/ من الأفضل عدم تلقيح النساء الحوامل ضد كوفيد 19، محطوهمش فالتجارب السريرية ومكاينينش دراسات علمية دقيقة عليهم.
12/ سلامة الفاكسان: كاين مركز التيقظ الدوائي كيراقب كولشي وكيدير تقارير فالمغرب، فحالة بان شي مشكل ممكن يوقفو عملية التلقيح.
13/ حاليا استراتيجية التلقيح فالمغرب معني بها الأشخاص لي فايتين 18 عام، مع اعطاء الاولوية للمهنيين في قطاع الصحة والأمن والتعليم والأشخاص المسنين والمعرضين للخطر.
14/ الأطفال معندهمش أولوية التلقيح لأن الخطورة أقل بكثير مقارنة بالكبار.
15/ غاتكون عندنا مناعة القطيع إذا وصلنا ل80 تال 90 في المائة من السكان تلقحو.
16/ عكس ما يتم ترويجه، الحقن ديال الفاكسان ضد كورونا غايكون ف الأغلب ف الجزء العلوي من الذراع.
17/ الشائع جدا هو الإصابة بالحمى بعد التلقيح، كيطرا بعد يومين من الفاكسان وكتمشي الحمى بعد يومين. لذلك باش ميتخلعش لي غايدير الفاكسان ياخد الباراسيتامول أو الإيبوبروفين.
18/ الوقت باش ترجع الحماية لراسك بعد اللقاح، تقدر ب سيمانا تا لجوج، لكن الدليل كيقول بلي التوقيت المحدد لأي لقاح ضد فيروس كورونا مرتبط بنوع اللقاح.
19/ لي عندهم أمراض المناعة الذاتية ولا الحساسية الموسمية والحساسية الغذائية غايديرو اللقاح. ماشي مشكل. وحتى لي عندهم نقص المناعة (حاليا مزال مكايناش دراسات علمية دقيقة).
20/ إذا كنتي من المخالطين خاص تأجل التطعيم (عملية التلقيح). حتى دير التيست.
21/ باقي تيست pcr معمول به فالسفر واخا كاين الفاكسان.
22/ مكاينش لي يضمن ليك بأنك مغاديش تقاس بالفيروس واخا دير الفاكسان، غير المعلومات الحالية تشير إلى أن اللقاحات التي تطويرها فيها فعالية بنسبة فايتا 90 في المائة.
23/ اللقاح ممكن يكون سنوي، وممكن يكون على 3 سنين تال 4 سنين.. مزال الأبحاث مستمرة.