علاش ما يكونش اول من يدير الڤاكسان ضد كورونا من الصحرا ومنها تطلق الدولة هاد الحدث لكبير؟ حدث بحال هادا عندو قيمة سياسية كبيرة ويضرب الدزاير والبوليساريو واللي تابعهم

Elouali.zaz.1987@gmail.com
من المرتقب أن تبدأ عملية التلقيح ضد فيروس كورونا على المستوى الوطني الخميس اللي جاي بعد وصول شحنة ڤاكسان أسترازينيكا أوكسفورد لكازا الجمعة للي فاتت.
وصول 2 مليون دوز للمغرب حدث مهم. تعطل بعد تصريحات لوزير الصحة خالد ايت الطالب فالعام اللي فات وكان وعد بتوصل الرباط ب17 مليون حقنة قبل نهاية 2020 وما كانش هاد الشي. المهم بعد ديك التعطيلة وبعد فضايح الحكومة تواصليا مع المغاربة اخرها مرور رئيس الحكومة الثلاث اللي فات فمجلس المستشارين وما كانش عارف باللي اللقاح جاي بعد ثلاثة ايام٬ وصلات اول طيارة محملة بالڤاكسان ومعاها امل شعب.
عملية التلقيح كيف شفنا فالعالم كلو كان عندها رمزية وفيها صورة الدولة والبلدان لي كتعرف تسوق لراسها خدمات على هاد الحانب وكنا شفنا بريطانيا فاش جابت سبدة مسنة وتم تلقيحها وشافها العالم كلو. شفنا هاد الشي فدول اوربية وغير اوربية اخرى. كل الدول دارت تسويق لهاد العملية بطريقة مقادة مصايبة.
علاش وزارة الصحة ديالنا والحكومة ما تمشيش فهاد الجانب وتدير حتى هي حملة لصورة المملكة المغربية فالعالم ويكون الحدث خاص وماشي عادي ونستاغلوه لترويج صورة مزيانة للمملكة المغربية، والأكثر من ذلك نروجو بيه نيت للوحدة الترابية للمملكة في ظل هاد الحرب الدعائية اللي كتقوم بيها الجزائر من نهار حررنا الگرگرات والإعتراف الأمريكي بمغربية الصحراء.
خاص وزارة الصحة تعطي انطلاق عملية التلقيح من الصحرا، تختار العيون أوالسمارة أو بوجدور او الداخلة او اوسرد او حتى الكركرات. تختار منطقة من هاد المناطق فهاد المدة وتتوجه إليها الأنظار، ونجيبو واحد من المسنين او واحدة من المسناتمن ساكنة المنطقة اللي يستحقو اللقاح٬ ونديرو ليه الڤاكسان. هنا طبعا تكون مواكبة إعلامية كبيرة بحضور فيها الإعلام الدولي وبعطي إيماج واعرة على لبلاد اولا وعلى الوحدة الترابية للمملكة ثانيا، ويكفي أن عناوين الأخبار كلها تروج لينا بالمزيان وتضرب گاع حتى مغالطات البوليساريو بالحرب، بل والأكثر من ذلك غادي توري للعالم أن المغرب غادي فتأمين سلامة مواطنيه بمافيهم الصحراويين والبوليساريو كتروج للحرب والخراب فالفيسبوك. طبعا هاد الشي كولو فاطار احترام تدابير حالة الطوارئ الصحية.
هاد المحطة راه مزيانة إيلى داروها المسؤولين وطبقوها. حنا فحاجة لهاد التسويق والترويج، فهاد الظرفية الخاصة بالضبط، خاصة ان نظام العسكر مازال ما جابش اللقاح للشعب الجزائري. راه خاص عملية التلقيح وانطلاقتها تكون من الصحرا وغادي نربحو بزاااف، وبدل ما تكون الگرگرات هي لي تُصَدر صورة المملكة، يكون اللقاح من العيون او الداخلة او مدن الجنوب ولشي سيدة أو سيد من ساكنة المنطقة هو لي يعطينا ديك ليماج ويسوقها لينا.