الرميد لعب اهم دور فتعيين بنعرفة رئيس حكومة واستقالتو ضربة للحزب واحتمال ترفض ليه لهاد الاسباب

استقالة مصطفى الرميد وزير الدولة المكلف بحقوق الانسان والعلاقات مع البرلمان البارح ما كانش فقط لاسباب صحية. الوزير والقيادي فحزب العدالة والتنمية كيعاني مشاكل صحية واليوم فالصباح غادي يدير شي عملية ماشي صعيبة بزاف ولكن هادا ما كافيش باش يستاقل ويكون المبرر حالتو الصحية كيف قال البيان.
وفق ما اعلنته "كود" البارح فالعلاقة بين الرميد وبنعرفة رئيس الحكومة ماشي تا لهيه. الرميد وفق ما علمته "كود" تقلق بزاف من تصرف رئيسو فتدبير ملف عندو علاقة بتخصصو كوزير مكلف بالعلاقات مع البرلمان.
صحيح ان الرميد مؤخرا كان فدارو بسبب مشاكل صحية وبسبب امور اخرى عندها علاقة بتدبير الحكومة لبعض الملفات. جريدة "اخبار اليوم" كانت تكلمات على ملف حقوق الانسان قبل ايام.
لكن واش هاد الاستقالة فهاد الوقت ممكنة؟ سياسيا ايلى وقعات راها ضربة كبيرة بزاف للحزب. نهار فاز حزب العدالة والتنمية بانتخابات 2016 التشريعية عين الملك محمد السادس فالبداية عبد الاله بنكيران حقاش كان امين عام للحزب. فاستقبال داروه فالقصر الملكي بالدار البيضاء كان التعيين وكان لقاء اخر ثلاثي فيه الملك محمد السادس وعبد الاله بنكيران ومصطفى الرميد. كان احتجاج علي امور كثيرة دارها الحزب كاعلان النتائج قبل الاعلان الرسمي وترشيح بعض الاسماء منها السلفي بمراكش حماد القباج.
الرميد من داك اليوم عرف ان بنكيران ما يمكنش يدير حكومة. وهادا ما كان وهذا كان احساس حتى بنكيران براسو.
من هنا جا دور الرميد فحكومة بنعرفة. حتى هاد العبارة ديال بنعرفة راه كان اول من وظفها باش سولاتو اولا "لكم" ومن بعد "كود" على واش ممكن يكون مرشح لرئاسة الحكومة. كان رد حينها "ما باغيش نكون بنعرفة الحزب".
طبعا كان بنعرفة اخر للحزب اللي هو سعد الدين العثماني.
الرميد كان كيبان ليه باللي الدولة ما غادياش تتسنى حزب العدالة والتنمية وباللي سوا بهاد الحزب او بغيرو خاص مؤسسات الدولة تستمر. على هاد الاساس كان عندو دور كبير فاعداد حكومة بنعرفة. علاقاتو من نهار دخل للحكومة تقوات مع مستشاري الملك ومع رجالات الدولة.
وزير الدولة كان دورو اهم من دور بنعرفة براسو فهاد الحكومة اللي خرجات وعشنا معاها.
اليوم ما يمكنش تكون استقالتو عندها علاقة فقط بحالتو الصحية. صحيح انو مريض ولكن مرضاتو امور اخرى ومع مرور الوقت اكيد اكتاشف تقديرو الخاطئ باش عول على بنعرفة. فلحظات مهمة بان باللي ماشي غير ضعيف وبلا شخصية بل ما قادرش حتى ينسق معاه كيف كان كيدير بنكيران.
هاد التقليقة ديالو بخصوص عرض ملفات على البرلمان غير ضربة المروحة وصافي. السيد لقاها سبة.
دورو لكبير فهاد الحكومة كيخلي الدولة تتشبث بيه. موحالش تقبل استقالتو. حقاش هاد الاستقالة غادية تكون عندها عواقب خايبة على حزب العدالة والتنمية. حزب تعرض لهزات بسباب التطبيع والكيف وملفات اخرى. التفريط فالرميد ضربة اخرى موجعة موحال شي جهة غادية تقبل بيها.