واش ممكن تيق فيه. حزب رئيس الحكومة عندو فلسطين حسن من فضايح سبتة. ما حرك فيه الفين مغربي قاصر حرگو فيهم اطفال

حزب العدالة والتنمية اللي كيسير لبلاد ما مسوقش اش واقع فالمغرب. ما هاموش. الاثنين دار اجتماع للامانة العامة وخرج اليوم لاربعا بيان. دارو باش كان ديك الساعة 6 الاف مغربي حرگ لمدينة سبتة المحتلة من كاستييخو. داروه باش كان على الاقل 1500 منهم قاصر. فيهم اطفال رضع مع ماواتهم. فيهم عائلات كلها مشات.
هاد الشي ما حرك فيهم والو. ما حركش شعرة فحزب رئيس الحكومة. كون دار خدمتو كون ما تشوهناش قدام العالم. هاد اللقاء حضرو رئيس الحكومة بصفتو امين عام للحزب. حضرو ماشي على ود ناس الشمال اللي دارو هجرة جماعية فغياب القوات العمومية المغربية من الحدود٬ بل على ود فلسطين.
قضية فلسطين كتهمهم كثر من قضايا بلادهم. كتهمو كثر من الاصوات اللي عطاوه لمغاربة باش يسير الحكومة ويلقى حلول.
من اصل 8 الامور اكدات عليهم الامانة العامة٬ كاينة نقطة وحدة على ما حدث. 6 اللولين كلها على فلسطين. فيها ادانة للعدوان الصهيوني اللي كان اللي ترأس هاد الاجتماع وقع معاهم هادي اشهر فقط. فيه تخربيق اخر على المجتمع الدولي والاشادة بدور الملك وتثمين ما قام به لمغاربة ودعوة ناس الحزب يشاركو فمسيرات ووقفات تضامنية مع فلسطين.
حتى فالقضية اللي هازة الرأي العام المغربي والاسباني الحزب كان اوت. قال باللي كيأكد "الموقف الرافض للحزب باستقبال إسبانيا لزعيم الانفصاليين" وانو كيرفض "الخطوة الاستفزازية والمسيئة من الجارة الإسبانية ضد الممكلة المغربية باستقبالالمدعو إبراهيم غالي رئيس الجبهة الانفصالية، وذلك في خرق سافر لعلاقات الشراكة وحسن الجوار بين البلدين، وتعبر عن انزعاجها الشديد من تلكؤ السلطات الإسبانية في القيام بما يجب من المبادرات لتصحيح الخروقات المسجلة، وعليها أن تستحضر جيدا الجهود المغربية المقدرة للوفاء بمقتضيات العلاقة بين البلدين كما عليها أن تتحمل مسؤولياتها تجاه أي تداعيات أو تبعات يمكن أن تنتج عن الوضعية الناشئة"
سكت ما هدرش على هاد الصور اللي فهاد المقال.