ككل سنة القلاعة كيديرو مابغاو في الامتحانات ديال البكالوريا وخا وزارة التربية الوطنية بتنسيق مع الأكاديميات الجهوية للتربية والتكوين كيدرو المجهود واللّي عليهم. هادشي كيبان من خلال تسريب الامتحانات على مواقع التواصل الاجتماعي. وخا داك الامتحانات تسرب بعد الموعد الرسمي على انطلاقها لكن كيفاش هادشي كيوقع؟. مهتمين بالشأن التربوي أوضحوا أن هادشي يتكرر بسبب ضعف المراقبة داخل مراكز الامتحان، مضيفا بالقول: "علاش مكاينش التقلاب؟، كيفاش الهاتف كيدخلو لهاد المراكز باش يتم تصوير الامتحان داخلها؟". مصدر من إحدى الأكاديميات الجهوية للتربية والتكوين أوضح أنه يتم حجز التليفونات ومجموعة من المعدات الإلكترونية اللّي كتستعمل ف الغش، وأقر في نفس الوقت أنه من الصعب جدا ضبط كولشي بسبب ضعف عدد من الإمكانيات. مسألة أخرى كتخلي الأساتذة اللي كيحضو هاد الامتحانات محبطين وهادشي كيساهم ف الغش. فحسب أستاذ بمدينة الرباط ل"كود" فإنه يتم إجبار الاستاذة باش يحرسو ف الامتحانات دون أن يحصلو على شي تعويضات، عكس المسؤولين ديال على تدبير هاد الامتحانات بوساء ف الوزارة أو الأكاديميات. امتحانات الباك كيف قالو مهتمين بالشأن التربوي ل"كود" خاصها إعادة النظر ف عدد من النقط الأساسية. خاص استراتيجية جديدة ماشي باش غادية بها الوزارة هادي سنوات طويلة. هاد الاستحقاقات مافيهش جديد على باقي السنوات.
