التراكتور تفشو ليه الروايض فالشمال.. انهيار تنظيمي والأعيان وعدد من الملايرية مبغاوش مزال يدعموه فالانتخابات

الأوراق الانتخابية اللي عند البام بداو يطيحو، فالشمال كولشي تالف، خصوصا بعد سقوط الرجل النافذ فالحزب احمد الادريسي رئيس جماعة كزناية اللي وقفاتو الداخلية وطيحاتو المحكمة الادارية من هاد المنصب.
الأمانة الإقليمية لحزب الأصالة والمعاصرة بعمالة طنجة أصيلة، دارت بلاغ الجمعة 11 يونيو الجاري، مهضراتش فيها على الحزب فجماعة اكزناية اللي معروف رئيسها الموقوف من من وزارة الداخلية وإحالة ملفه على القضاء الإداري الذي حكم بعزله في المرحلة الابتدائية.
البام فعمالة طنجة حدد سميات منتخبيه اللي تمت تزكيتهم لمجالس المقاطعات الأربع، في سياق كيعرف فيه هاد الحزب، حسب مصادر بامية فالشمال، حالة من "التشرذم الداخلي فمختلف مناطق جهة طنجة تطوان الحسيمة".
وتابعت ذات المصادر بلي "بام 2015 و2016 مبقاش، الملايرية اللي كيدعمو هاد الحزب الانتخابات، مبقاوش باغين يدعموه، واخا يجيو عندهم كبار المنتخبين ديال التراكتور"، مضيفا :"كان نزيف داخلي وهروب المنتخبين الكبار للأحزاب الأخرى".
واستغرب ذات المصدر أن "قيادة البام كانت عارفة بالخروقات ديال الادريسي رئيس جماعة كزناية ولكن مادرتش ليه تا عقوبة أو توقفو او طردو، بل الامين العام وهبي صرح بلي مستعد يدافع عليه ومغاديش يتخلى عليه، هادشي كيتناقض مع الوعود اللي جاب بها وهبي".

كاين مناطق كثيرة فيها خلافات بين قيادة الرباط المركزية وبين الفروع، خصوصا "هاد الحزب مكانش منظم بزاف وتوقف مور انتخابات 2016 بعد الهزيمة النكراء اللي تلقى على يد بنكيران، توقف التنظيم وتوقف كولشي، حزب صعيب يتجمع ويتقاد" يقول نفس المصدر.
بقات ثلاثة أشهر فقط من موعد الانتخابات، روينة نايضا بين الاحزاب، كاينا احزاب قادات تنظيمه، في حين البام والاستقلال كيعانيو من "الدوباج ديال 2016 واللي طرا ليهم قبل خصوصا انسحاب شباط من الحكومة، هاهو شباط واحلين معه ف الاستقلال، كيفما واحل وهبي مع بقايا الياس العماري" يقول نفس المصدر.

يشار إلى أهم المنتخبين الكبار باسم الأصالة والمعاصرة في الولاية الانتخابية المنتهية، بدا يهزو الرحيل لأحزاب أخرى سواء خصوصا عمالة طنجة أصيلة، إقليم شفشاون، تطوان، المضيق الفنيدق، والعرائش.
ورغم ما يروج عن التحاقها إلى حزب آخر، أكدت فاطمة الحساني رئيسة مجلس جهة طنجة تطوان الحسيمة، الاعلامية السابقة ف لاماب، ل"كود" أنها "باقية في حزبها ولن تغادره وهذه فقط اشاعات، انا انخرطت أول مرة في البام وسأبقى وفية له".
البام فطنجة، حسب نفس المصدر الحزبي، عندهم الادريسي، الى مشا ليهم صعيب يديرو شي حاجة.