أخيرا نزار السبيتي مشا للمكان ديالو الطبيعي : سبيطار الأمراض العقلية و النفسية و لي بزاف ديال اليوتوبورات و التيكطوكوزات خاصهم يمشيو يحجوا ليه باش يداويو الأمراض النفسية لي كايعانيو منها عوض يسترزقو منها

نهار بان الظاهرة "نزار " قلت بلي السيد بلاصتو فالسبيطار لتلقي العلاج ! واخا مو كانت ناكرة بلي راه مريض و كادافع عليه و كاتعاير عباد الله و كلشي كان ضارب الطم على المرض النفسي لي كايعاني منو ( تال من بعد فاش غاتفرش القضية غاتخرج مو تعتارف بلي راه مريض بزز منها)! الولد من أول ظهور ليه فاليوتوب كان باين مريض و خاصو يتأوسبيطاليزا قبل مايدير شي كارثة فراسو و لا فشي حد !
طبعا حتى واحد ماكان باغي يعتارف بالمرض ديالو لبزاف ديال الاسباب ! كاين الأسر لي ماكايرضاوش بالمرض النفسي و حتى المرض العضوي ! كايحشمو يگولو ولدنا راه مريض ! فحالا المرض عيب ! و كاين واحد الاستخفاف بالمرض النفسي ! بنادم عوض يقوليك راه فلان مريض كايبقا يلوك فالهضرة و يقوليك اه حقا راه نية ! اه حقا عندو غي شي مشاكل و صافي ! اه حقا فحال شي دري صغير ! كاتجيه قاصحة يقوليك راه فلان عندنا مريض و خاصو الطبيب ! و طبعا كاينة حتى الاستفادة المادية لي مستافدين منو خوه و صحابو و مراتو و گاع اليوتوبورات لي كايضربو الملاين على ظهر المرض النفسي ديال نزار و لي ماشي فمصلحتهم انه يدخل للسبيطار واحد الشهر و لا شهراين و يطيح ليهم الادسنس !
و طبعا حيت المرض و الموت الانسان ماكايهربش منهم ! البارح نزار غايديوه دارهم للسبيطار ! و هاكاك عوض انه يبقا تما و يخليو يتعالج بداو كايخرجو اليوتوبورات لي واكلين على ظهرو ملاين الادسنس يبكيو و يتخننوا و يطالبو بالخروج ديالو من السبيطار فحالا الطبيب لي كتب ليه بلي خاصو يتشد فالسبيطار راه مكلخ ماقاري والو ! عاد غايجيو اليوتوبورات يوريوه خدمتو.
اليوم اليوتوب و التيكطوك و انستاغرام عامر بالظواهر لي خاصها تكون لابسة الكسوة مقلوبة فالسبيطار و كاتشرب الدوا ديالها و كاتهضر مع الطبيب الاختصاصي باش يحاول يوصل معاها للعلاج و عوض هادشي كانلقاوهم كايصورو الڤلوگات و الڤيديوات و كايسترزقوا هوما و الاسر ديالهم و صحابهم بالمرض النفسي ! فحال واحد السعاي كايكون حدا ماكدو د المعايف حاط واحد رجل مقطوعة قد الشاوارما باش تصدق عليه !