مات "أنطوني باراخاس" (Anthony Barajas)، واحد من مشاهير "تيك توك"، متأثرا بجروحو من بعد ما تضرب بالقرطاس فسينما فكاليفورنيا. وكان "أنطوني باراخاس" (19 لعام) مع صاحبتو "رايلي كَودريتش" (Rylee Goodrich)، كان حاضر معاها السيمانة اللي فاتت فعرض فيلم "ذي فوريفر پورج" (The Forever Purge) فقاعة سينما فمقاطعة "كورونا" (ولاية كاليفورنيا) اللي بعيدة ب75 كيلومتر على لوس أنجلوس، قبل ما يتضربو بجوج بالقرطاس. وماتت "رايلي" فالبلاصة، أما "أنطوني" هزوه للصبيطار بسباب تعرضو لإصابة خطيرة قبل ما يموت هو لاخور. وكان عند أنطوني باراخاس، المعروف على الإنترنت باسم "إتس أنطوني مايكل" (itsanthonymichael)، تقريبا شي مليون متابع على "تيك توك"، فين كان كاينشر مقاطع فيديو قصيرة كاتوثق حياتو اليومية. والشرطة اعتاقلات المشتبه به "جوزيف خيمينيز"، اللي عندو 20 عام، لكنها قالت أنها كاترجح فرضية "الهجوم غير المبرر". وقالت قوات الأمن انهم لقاو فردي وأدوات مرتبطة بمسرح الجريمة فدار هذا اللي شدوه. وكاتعرف ميريكان تصاعد جديد فحوادث العنف المسلح، واللي وصفها الرئيس الميريكاني جو بايدن بأنها "آفة".
