الأحرار باغي ياخذ رئاسة 3 غرف مهنية ف الشرق ويسد الباب على البام.. وميمون أوسار مرشح حزب "الحمامة" لترأس غرفة الفلاحة ل"كود": عندي حظوظ كبيرة باش ناخذ الرئاسة من جديد

كيراهن حزب التجمع الوطني للأحرار، على ترأس 3 غرف مهنية فالشرق، بعدما حصل على مقاعد مهمة ف انتخابات الغرف المهنية وبيناتو قوة سياسية فجهة الشرق، وباغي يسد الباب على حزب "البام"، بعدما فتح نقاش مع حزب الاستقلال وباغي يدخل معاه ف تحالفات، ف أفق التفاهم على الامتيازات اللي غادي يخذها كل حزب.
وذكرت مصادر ل"كود"، أن "الحمامة" مرشحة محمد قدوري الرئيس السابق لغرفة الصناعة التقليدية ف الناظور، لرئاسة الغرفة على مستوى الجهة، ف حين مرشحة كل من ميمون أوسار وحفيظ الجاردوي، لرئاسة غرفتي الفلاحة والتجارة من جديد، في حين رشح "البام" إدريس بوجوالة لرئاسة غرفة الصناعة التقليدية، وخالد البرنيشي لرئاسة غرفة التجارة، ومحمد المومني لرئاسة غرفة الفلاحة.
وحاولات "كود" الاتصال بمحمد أوجار المنسق الجهوي لحزب الأحرار ف الشرق، باش يعطينا فكرة على التحالفات اللي غادي تكون، إلا انه ماجاوبش، في حين كان عمر أحجيرة المنسق الجهوي لحزب "الاستقلال"، قال ل"كود" إن "الميزان" ف مرحلة متقدمة من المفاوضات مع حزب الأحرار، وأنه باغي تكون التحالفات مؤسسة وماشي فردية.
ومن جهته، قال ميمون أوسار مرشح حزب "الحمامة" لترأس غرفة الفلاحة ف تصريحو ل"كود"، أنه عندو حظوظ كبيرة باش ياخذ الرئاسة من جديد، بعدما دار تحالفات مع كل من حزب الاستقلال، الحركة الشعبية، والتقدم والاشتراكية، وهاد الشي ك يبين بللي أن الغرض من هذ التحالف هو قطع الطريق على مرشح "البام" لرئاسة الغرفة.
وبخصوص التحالفات اللي ممكن تكون على مستوى غرفة التجارة والصناعة والخدمات فالشرق قال حفيظ الجارودي مرشح "الحمامة" لرئاسة الغرفة ف تصريحو ل"كود"، أن حزب الأحرار حصل على أرقام جد مريحة وجاب 19 مقعد، والمفاوضات لا زالت جارية والصورة ما وضحاش مزيان، في حين قال انه ماشي من اختصاصو انه يعطي تصريح بخصوص موضوع التحالفات لان الأمر يتعلق بقيادة الحزب، لافتا إلى أن كل ما يمكن فعله هو أن غرفة التجارة على مستوى الجهة تقوم بتنزيل الرؤية الملكية على أرض الواقع.
ومن جهته، رفض محمد قدوري مرشح حزب الأحرار لرئاسة غرفة الصناعة التقليدية بالشرق الإدلاء بأي تصريح ل "كود"، حيت قال إن الأمور باقيا ما تحسماتش وان أي تصريح غادي يعطيه ماشي ف صالحو، ف حين حاولات "كود" الاتصال بمرشح حزب الأصالة والمعاصرة إلا أن تليفونو كان خارج التغطية.
وبالرغم من المقاعد اللي ك يتوفر عليها حزب التجمع الوطني للأحرار ف الغرف المهنية، فان المرشحين خايفين ما يجيبوش الرئاسة ديال الغرف، حيت تركيبة الغرف كتفتح المجال أمام جميع الأحزاب الممثلة ف الغرف المهنية، أنها تخربق اللعب، بعدما ولات فاهما الأحزاب الأخرى شنو باغيا..وهنا كتبقى الحظوظ عند حزب الاستقلال اللي باغي تاهو ياخذ رئاسة إحدى الغرف الثلاث ، ورامي عينو مزيان على غرفة الصناعة التقليدية.
وحسب المعلومات المتوفرة لدى "كود" فانه في حال وصلات المفاوضات لبلوكاج، فان عزيز أخنوش، رئيس حزب التجمع الوطني للأحرار،غادي ينزل للشرق خلال الأيام المقبلة، ويفك بيدو جميع المشاكل مع باقي الأحزاب.