نهار مورا نهار ك يتبين بللي شعار "خاوة خاوة" اللي ك يرفعوه الشعبين المغربي والجزائري ك تعامل معاه سلطات قصر المرادية ف الدزاير بسياسة الآذان الصماء، حيت باغيا تفرق بين الشعبين وتعطي بالظهر نتاعها للمغرب ف انتهاك صارخ لحسن الجوار، واللي ك يبين هاد الشي هو رفض السلطات الجزائرية تلقي المساعدات من المغرب اللي باغي إساهم معاها ف إطفاء النيران اللي شعلات ف 17 ولاية ف الدزاير مجانا وقتلات 69 شخص، وفضلات أنها تقبل المساعدات د فرنسا اللي كانت محتلاها من قبل، وتكري طياير اللي غادي إكلفوها مبالغ مالية كبيرة..ومتجاوبش على طلب المغرب لا ب نعام ولا لا. المبادرة المغربية، اللي عطا التعليمات نتاعها السامية الملك محمد السادس، لقات تجاوب كبير من قبل نشطاء جزائرين، حيت دعاو الرئيس الجزائري عبر شبكة الانترنت لتجاوز حالة الجمود اللي ك تعرفها العلاقات المغربية – الجزائرية، وقبول المساعدة من أجل إطفاء الحرائق وإنقاذ حياة المواطنين من الخطر..لكن السلطات الجزائرية دارت راسها وكأنها مسمعات تاشي حاجة وتعملات بمنطقة "معزة ولو طارت". ويرى متتبعون، أن تعامل السلطات الجزائرية مع المغرب يتسم ف غالب الأحيان بنوع من الميزاجية، خاصة وأن المغرب لوقيتا اللي ضرب فيه الزلزال إقليمالحسيمة وخلف العشرات من الضحايا، تقبل منها المساعدات الإنسانية بالرغم من أن الحدود البرية المغربية الجزائرية كانت مسدودا، حيت سيفطات جوج د الطياير، وقالت الجزائر ف شخص وزير الدولة المنتدب المكلف بشؤون الجماعات المحلية، دحو ولد قابلية، سنة 2004، في تصريحات صحفية أن هذه المساعدات الإنسانية "تدخل في إطار التضامن الدولي مع الشعب المغربي الشقيق". وفي هذا الإطار، ك يبقى السؤال المطروح: "علاش الدزاير رفضات المساعدات المغربية..والمغرب رحب بيها ف زلزال الحسيمة."؟..علما أن رئيس الهلال الأحمر الجزائري بالنيابة، باعدونة محمد الصالح، قال أثناء زلزال الحسيمة، أن فرقة الإنقاذ كان فيها 73 عنصر من عناصر الحماية المدنية من بينهم تسع أطباء و56 عنصر بحث وإنقاذ وعناصر مساعدة إلى جانب مجموعة من كلاب الأثر المدربة على البحث عن الضحايا تحت أنقاض المنازل المدمرة. وأكد باعونة آنذاك، على أن هذه العملية "تعتبر واجبا إنسانيا نحو الأشقاء المغاربة وتندرج في إطار التضامن بين الهلال الأحمر الجزائري ونظيره المغربي". وف لوقيتا اللي ك يتحرق فيها الشعب الجزائري وك يمد المغرب يد العون والمساعدة، خلات الجزائر الشعب نتاعها ك يتحرق وتفوت عليه مدة يومين أو 3 أيام بلا متجاوب المغرب اللي باغي اسيفط ليها جوج د الطياير من أجل إخماد النيران..وبالتالي ك يبقى المجال مفتوح لطرح أكثر من سؤال..علاش الدزاير فيها هذ النوع من لعناد ..وعلاش تعاملات مع المغرب بكل بوردة..وعلاش خلات الدزاير ك تحرق وما تخذش المساعدة من عند المغرب.. وفين هي روابط الأخوة والمصاهرة والعقيدة المشتركة والدم..واش الدزاير حقودة حتى لهذ الدرجة.. الحاصول غادي نطرحو السؤال من جديد ونقولو :" شكون باغي احرق ادزاير".
