دوك الاسر فحال اسرة شباط لي كلهم باغين يديرو السياسة الأب و الأم و الإبنة واش عندهم شي شغل آخور و لا مايكسابوهش ؟ شي قراية شي حرفة شي كابيني ميديكال شي حاجة توكلهم طرف د الخبز من غير السياسة ؟

الظاهرة ديال الاسر السياسية لي كاتلقاها كلها عندها ميول سياسي كاينة فالعالم كامل ففرانسا كاينة عائلة لوبين ! فميريكان عائلة بوش فالمغرب الفاسي الفهري للمثال و ليس الحصر ...كاينين هاكا عائلات كاتلقاهم ترباو فمناخ سياسي و بالتالي هادشي كايأثر على ولادهم وولاد ولادهم !
ولكن ماشي لدرجة تولي السياسة هي طرف د الخبز دديك العائلة ! السياسة هي لاكاريير ديالك ! فحال عائلة شباط مثلا ! لي فاش سمعت الحوار ديالو مع المهداوي ندبت ترمتي بقوة الفقصة ! آه وي ! المهداوي كايسول فالشرق و شباط كايجاوب فالغرب السيد شبعان لغة الخشب و شبعان تلاوي و ملاوي و ماكايفرقش بين العلمانية و الالحاد و بين حزب يميني و حزب يساري و باينة فيه وصل للمناصب لي وصل ليها ماشي حيت هوا واعر فالسياسة لا ! حيت لي دايرين بيه مستواهم هزيل جدا جدا جدا !
شباط راه وصمة عار فجبين الساحة السياسية المغربية كانقولها و نعاودها و مدام فحال شباط مازال كاينين فالمغرب راه هذا كايدل على النيڤو الهابط بزاف ديال السياسة فالمغرب! السيد شوف شحال و هوا غابر فتركيا تاااااا وصل وقت الگاميلة الانتخابية عاد جاي كايجري يغمس!
واش دابا طفرو تا شباط بقا غا طفرو مراتو و بنتو! عائلة دايرين يدهم فيد بعضياتهم و مرشحين طامعين تاهوما فالمناصب ! ماشبعوش ؟
سيرو آ صاحبي ديرو ليكم شي خدمة و لا حرفة و علمو ولادكم يقراو و يخدمو على راسهم عوض انهم ياخدو السياسة حرفة ! سيرو ديرو شي حاجة اخرى من غير السياسة
اقهرتونا بالغباءالمتوارث !