رؤساء الاندية جابو حروبهم للانتخابات. الناصري بدعم من جودار جاب حسبان باش ما ينجحش بودريقة ورسل ولد مول الكتبية باش يطيح ايت منا وهما جابو ليه ولد الشهبة باش يبرزطو فدائرتو

الحروب اللي كاينة بين رؤساء اندية الوداد والرجاء وشباب المحمدية الحاليين والسابقين ما بقاتش رياضية ولات سياسية. هاد الحروب دابا كاين فدوائر انفا سيدي بليوط وفداء درب السلطان والمحمدية. ابطالها سعيد الناصري رئيس الوداد وهشام ايت منا رئيس شباب المحمدية ومحمد بودريقة رئيس الرجاء السابق وسعيد حسبان الرئيس السابق للرجاء وعزيز شبين او ولد الشهبة مول الصقالة والبوديگا ورئيس الوداد كرة السلة.
هادو فيهم اللي كانو صحاب بيناتهم واليوم تخاصمو. باش جات الانتخابات٬ جابو هاديك لخصومة للسياسة. الخصومة فالسياسة عندهم ماشي علي برامج او توجهات او مشاريع مجتمعية. اللا. غير شي باغي يضرب شي.
سعيد الناصري مرشح فدائرة سيدي بليوط فكازا باسم الاصالة والمعاصرة ومحمد جودار العضو الجامعي وعضو مكتب الرجاء البيضاوي مرشح فقلعتو بنمسيك باسم الاتحاد الدستوري وهشام ايت منة مرشح فالمحمدية باسم التجمع الوطني للاحرار وسعيد حسبان مرشح باسم العود =الاتحاد الدستوري= فدائرة درب السلطان. نفس الدائرة فيها محمد بوريقة عضو المكتب السياسي للتجمع الوطني للاحرار.
وشبين مرشح باسم حزب الاستقلال وولد مول الكتبية اللي ما عندو علاقة لا بالسياسة لا بالرياضة مرشح باسم التراكتور.
دابا باش عطينا كل واحد وفين مرشح٬ اجيو نقولو ليكم يا قراء "كود" كيفاش مسيري الاندية نقلو صراعهم من تيران الكورة لتيران السياسة.
كاين سعيد الناصري باغي خصومو محمد بودريقة وهشام ايت منة يخسرو الانتخابات. هاد الشي علاش جاب لايت منة ولد مول الكتبية وركبو علي التراكتور. الهدف الاول هو يبرزط ايت منة ويخليه يخسر. طبعا ايت منة ماشي ساهل ليه وناض حتى هو جاب ليه ودادي كان قلبو طايب علي الناصري ورشحو فدائرتو سيدي بليوط فكازا وهو رئيس الوداد البيضاوي لكرة السلة شبين مول البوديگا والصقالة...
الناصري دار حتى لبورديقة وقنع صاحبو محمد جودار باش يعطي التزكية لحسبان باسم العود وولى منافس ليه فدائرة درب السلطان.
المهم نايضة بزاف بين رؤساء الاندية. كانو كانو فيهم شي وحدين صحاب ودارت ليام وولاو خصوم بحال الناصري وايت منة. ونتفرجو فهاد الماتشات هاد ايام الحملة. التشويق حاضر