وا الرعاع راه لي مكلخ مكلخ ! و لي فاشل فاشل ! بلا ماتجيبو السبة على الفرنسية لي هي لغة جميلة و متطورة نتا مثلا دلقوشك اعوج و عندك مشكل فنطق ليڤًواييل تبغي تقول jeudi تخرج ليك Joudi راه الفرنسية غير مسؤولة عن الدلقوش الاعوج لي عندك !

الانجليزية لغة مسيطرة فالعالم و هادشي راجع لعدة أسباب ! منها ماهوا مرتبط باللغة فحد ذاتها و بالسهولة ديالها و بالغنى ديالها بالمفردات و منها عوامل خارجية غير مرتبطة باللغة بحد ذاتها بل مرتابطة بالهيمنة الاقتصادية و التكنولوجية ديال الدول لي كاتدوي بيها !
و لكن عكس الفكرة العوجة لي بغاو اللحايا و شي مكلخين تابعينهم بالنافخ يصوروها على أنه الفرنسية لغة ميتة ماكاتصلاح لوالو فإطار هاشطاغ # نريد استبدال الفرنسية بالانجليزية راه الفرنسية لغة مهمة و مهمة جدا ! أولا حيت ثقافيا الفرنسية أقرب لينا كمغاربة و كاتشكل جزء مهم من الهوية ديالنا و من الدارجة ديالنا ! صندالة ! بوڤري ! جمافو ! صافا! تيليفون ! طوموبيل ... هادو كلها كلمات فرنسية دخلات فالدارجة ديالنا و تغلغلات فيها الشيء لي ماكاينش مع لونگلي ! و ثانيا اقتصاديا فرنسا شريك مهم للمغرب لاماكانتش الشريك الاقتصادي رقم جوج مورا الاتحاد الاوروبي !فرانسا هي أول مستثمر فالمغرب و موجودة فگاع القطاعات و بالفضل ديالها بزاف ديال المغاربة خدامين و كاياكلو الخبز هادشي لي مادايرهاش ميريكان ! فرانسا كاتستورد من المغرب و فإطار عملية الاستيراد كاندخلو معاها الزبابل ديال العملة الصعبة لي ماغاتعطيهاش لينا ميريكان و لا النگليز ! فرانسا هي أول بلد كايجيونا منو تحويلات المغاربة القاطنين بالخارج و من اهم البلدان لي فيها الجالية المغربية ! فرانسا كاتعطينا المساعدات ! فرانسا كاتقري لينا ولادنا فابور فالمعاهد و الجامعات ديالها و كونات أطر بلا عدد نفعوا المغرب فعدد كبير من القطاعات ! هادشي طبعا لي مستحيل تحلم ديرو مع ميريكان و لا النگليز !
و بالاضافة لهادشي ! الفرنسية كلغة راها لغة مهمة و مهمة بزاف ! الفرنسية هي ثاني اكثر لغة كاتقرا فالعالم و اللغة لي غاتلقا ناس كايهضرو بيها فالقارات الخمس ديال العالم ! ميتين مليون شخص و ستة و سبعين دولة ! لاكنتي كاتعرف الفرنسية راه غاتقدر تقرا فأعتى الجامعات العالمية فحال السوربون و المدارس العريقة فحال القناطر و الطرق، بوليتيكنيك فابور او بأثمنة رمزية ! اما لاكنتي باغي تخدم فشي شركة دولية راه عدد الشركات الدولية لي الفرنسية لغة مهمة فيهم لا تعد و لا تحصى و لا بغيتي كاريير فالمنظمات العالمية فحال اليونيسكو مثلا راه الفرنسية لغة لا محيد عنها !
الفرنسية لغة الانوار و الثورة الفرنسية ! لغة الشعر و الحب ! لغة جميلة ! انيقة ! كاطلب مجهود باش تميتريزيها ولكن لاذوقتيها غادي تعجبك !
اذن علاش هاد الحملة المنظمة من طرف شرذمة ديال اللحايا المكلخين و الرعاع ؟ حيت شنو حيت الفرنسية لغة المستعمر ؟ نتا لدين امك آ الروعاعة ماغاتساليش من هاد الاسطوانة ديال المستعمر والو ؟ حضرتي نتا لشي استعمار ؟ شفتيه ؟؟ ايوا لاش آ الحقود آ المهتوك كاتهضر على شي حاجة ماشفتيهاش ! علاش غا نتوما من دون الناس لي ماكاتعرفوش تشوفو المستقبل و مقابلين الماضي ! حنا ولاد اليوم بغينا نبنيو المستقبل راه دول فحال فرانسا و المانيا و الجابون و الصين و فرانسا و النگليز تقاتلو و تذابحو و دازو بيناتهم حروب و هادشي مامنعهمش اليوم انهم يكونو تحالفات و يخدمو مع بعضياتهم و يستافدو من بعضياتهم ! واش يصحاب دينمك العلاقات الدولية فحال العلاقة بين مك و مرت خوك لي ماكايتهاضروش هادي عشر سنين على ود بانيو متقوب!
و لي كايقول "الفرنسية لغة ميتة ماشي لغة العلم "! بزاف على يماك ! العربية هي لي لغة ميتة و ماشي لغة العلم و العلماء ! اما الفرنسية راها لغة متطورة و متجددة ( ماشي بالسرعة ديال الانجليزية) و لكن بسرعة كبيرة تاهي ! فرانسا راه هي بلد معهد باستور ! بلاد السيرن ولكن نتا غي مكلخ آش عندك ماتعرف ؟
الحاصول راه لي فاشل فاشل و لي مكلخ مكلخ و لي فمو عوج فمو عوج ماقادش ينطق les voyelles و يبغي يقول vendredi تخرج ليه Voundroudi !
Jeudi Joudi
Ambiguë – Ambigui
Téléphone -Tiliphoune
غا سير تعلم تحل فمك مزيان الفرنسية غير مسؤولة عن الدلقوش الاعوج لي عندك !