نتا لي مازال كادافع على التعليم بالعربية الفصحى واش كاتاكل بيها طرف د الخبز ؟

“بغيتو تكلخو لينا ولادنا”
” واش غاتقريو ولادنا البغرير”
” كاتفلاو على ولاد الشعب بالبغرير و غريبة …”
بعض التعليقات لي قريت على خبر ادماج اسماء بعض الاكلات المغربية بالمقررات الدراسية ! خبر كان كافي باش ينوض الريتول فشريحة واسعة ديال المغاربة ! لي بقوة ماشفتهم كايتشكاو تخايلت بلي كانو عندنا شي مقررات واعرين بزاف ! و بلي الجامعات عندنا مصنفة عالميا! و بلي هاد الكليمات هوما لي غايخرجو لينا زعما على التعليم و يخليو كوريا الجنوبية تتشفا فينا.
راه مهم بزاف آ بعرور للدري الصغير لي يا الله دخل للمدرسة يلقا فيها شي مفاهيم و كلمات قراب ليه ! قراب للهضرة لي كايهضر فدارهم ، باش ماتكونش قطيعة بين الدار و المدرسة ! قطيعة لي كاتخلي بزاف ديال الاطفال مايسايروش فالقراية ديالهم ( فحال الحالة ديال الاطفال لي كايهضرو بالامازيغية فالدار و كايدخلو للمدرسة يلقاو استاذ شمالي كايقريهم ” كتب كريم كتبت مريم” !
مهم بزاف لواحد الدري عندو ست سنين يا الله داخل يتعلم القراية و الكتابة يلقا شي مقررات قريبة ليه. و شنو فيها غريبة و البغرير ؟ ياك اسماء اكلات مغربية ! كيما كاتقرا اسماء اكلات فرنسية فالمقررات الفرنسية ! كيما كاتقرا هامبرغر فالمقررات الامريكية حيت هامبرغر اكلة اشتاهرات فامريكا بزاف ! علاش الطفل المغربي مايلقاش كلمات اكلات مغربية فالمقررات المغربية ؟ فين كاين المشكل ؟
ثم هادوك المقررات راهم مقررات ديال الابتدائي ! يعني مقررات موجهة لاطفال يا الله كايگولو بسم الله فالمدرسة ! الصيف كولو و هوا كايجري فالزناقي ! نهار الاحد غسلات ليه مو فالحمام و الاثنين لبساتو حوايجو الجداد و سيفطاتو للمدرسة ! خاصهم يحبوها بعدا و يولفوها و مايشوفوهاش كحبس ! باش يقراو .
باش بغيتي المعلم يتلقى ليه بالدرس ديال المعادلات التفاضلية ؟ و لا ديوان زهير بن أبي سلمى؟
راه ديفو كبير هذا لي فالمغاربة لي ماراضينش بهضرتهم و كلماتهم و كايشوفوها عيب ماخاصهاش تكون فمقرر دراسي، و هادشي كلو السبب ديالو الاحساس بالدونية لي عند المغاربة اتجاه ” الدارجة” و لي السبب ديالو تاريخي و سياسي ( ماشي موضوعنا).
الزميلة نهاد فتحي هضرات عليه فالرابط اسفل المقال.
باختصار شنو خاص الدري فسنوات الدراسة الاولى ديالو يتعلم ؟
خاصو يتعلم يكتب مزيان
يقرا مزيان
و يحسب !
ثلاتة ديال الحوايج مهمين ليه بزاف باش من بعد يكون واجد يقرا الفيزيك و العلوم و الفلسفة و التاريخ … ثلاتة د الحوايج لا رابع لهما ! و هادي هي الفلسفة لي غادي بيها العالم كامل ! بالاضافة لبعض الحصص من الرسم و الفنون النشاط العلمي لي الهدف ديالهم هوا يحلو عوينات الدراري الصغار على العالم المحيط بيهم و ينميو عندهم ملكة التفكير و طرح الاسئلة.
بالنسبة للغة التعليم! المشكلة الكبيرة لي عندنا فالبلاد هي انه هاد الموضوع كلشي باغي يدخل يغمس فيه و كولا و حساباتو!! و اغلب لي كايدافعو على العربية الفصحى كايدافعو عليها لأسباب ايديولوجيا محضة ! يعني ماسوقهم هوما لا فشنو غايتعلم الطفل ! لا فواش غايلقى قطيعة بين الدار و المدرسة ! لا فواش اللغة لي غايقرا بيها غايستافد منها عمليا فحياتو ! لا والو ! اغلب المدافعين عن اللغة العربية الفصحى كايقدمو المصلحة ديالهم السياسية و الايديولوجية و الدينية و كدا كداشي على مصلحة الطفل المغربي لي غايولي شاب مغربي كايسلخو فيهت المرود حدا البرلمان لابقا تابع غا العربية ! ناس كايتخايلو بلي كاينة شي مؤامرة عالمية ضدهم ! كايتخايلو بلي ميريكان مثلا باغا “تكلخهم” ههههههههه ! يا سلام على النوابغ !
كاتقوليه راه ماصالحة ليه لوالو فحياتو وخدمتو !
كايجاوبك ” هذا هجوم على الهوية العربية ديالي ”
كاتقوليه واسيموحمد الرجوع الله ! الهوية ديالك راها مغربية ! راك مغريبي ماشي ” عربي” ! كاتاكل غريبة و المسمن و البطبوط !
كايجاوبك ” لغة القرآن”
كاتقوليه ايه ايه و من بعد ؟
كايخرج فيك عينيه و يقولك ” لغة القرآن” ياااء !
يا ودي ايه ايه لغة القرآن ! زيد ماعندك ! من غير القرآن ! حيت الهدف ماشي هوا نكونو جيش ديال الفقها كايقراو على الموتا !راه الهدف هوا متعلمين قادين يشقو طريقهم فالمستقبل و يخدمو و تكون منهم الكاينة ! يقراو العلوم و اللغات و يلقاو المراجع متوفرة ! فيناهوما المراجع على الرياضيات و الفيزياء و العلوم و الطب و الهندسة و الاستثمار و الفينونص بالعربية الفصحى ؟ ماكاينينش ! و لي كاينين ماكافينش !
ومن هادشي كامل ! ياك سنين و منين و حنا كانقراو بالعربية و نقريو ولادنا بالعربية ! شنو النتيجة ؟ والو !مستوى تعليمي فالحضيض ! جيوش ديال التلاميذ لي ماكايتقنو لا عربية لا فرنسية لا انجليزية ! ماعندهمش الكفاءة اللازمة باش يسددو الحاجيات ديال سوق الشغل ! و كايداحسو باش يدوزو الكونكورات ديال التعليم ولا البوليس ولا الجادارمية و الفراملية باش يدكوه فالدولة…
نتيجة سنوات ديال التعريب هي تخريب للدولة و المجتمع و اغتصاب لفرص بزاف ديال الشباب باش يلقاو خدمة، حيت الكونكور ديال ليزوطيس دوليغ هوا اللخر ( سرباية فالطيارة) كايطلبو ليه فيه لونگلي تكون مزيانة.
انا شخصيا كاتعجبني العربية ! كايعجبني نقرا الشعر العربي ! و نسمع للشعراء ! و لكن واخا هكاك كايجيني راسي ضيعت وقت كبير من حياتي كانقرا العربية و الصرف و التحويل و المحفوظات و الاعراب و فاللخر ماصورت تاحاجة من هاد العربية الفصحى ! كونكريطمو مانفعاتني فوالو مادوزت بيها كونكورات ماسولوني عليها فليزونطروتيان ماخدمت بيها ! و كانشوفها واخدة اكثر من اهميتها و اكثر من وقتها و الحيز الزمني المخصص ليها اكبر بكثير من النفع لي غاينتافع بيها الواحد فحياتو داكشي علاش كانشوف بلي هي خاص يتنقصو السوايع ديالها و المواد لي كايتقراو بيها ( مثلا المواد العلمية ماليها تامعنى تتقرا بالعربية) و حتى الفلسفة و التاريخ و الجغرافية من الاحسن يتقراو بلغات اخرى لي البحوث و المراجع متوفرة فيها بكثرة فحال الانجليزية و الفرنسية.
و تبقى للعربية واحد الساعة او ساعتاين اسبوعيا يتعلم فيهم التلميذ بعض الاساسيات و شوية د الشعر الجميل…
و طبعا لي بغا يزيد يتعلم العربية راه كاين لانتيرنيت ! طيليشارجي مع راسك فالدواوين و القصص و الروايات و قرا مع راسك تاتشبع.