شنو غادي يوقع گاع لا بدلنا لغة التدريس من العربية للانجليزية فحال الهنود ؟ شنو غانخسرو و شنو غانربحو ؟ علاش شادين فالعربية واخا ماكاتوكلش طرف د الخبز

واحد الحاجة وليت كانلاحظها مؤخرا فاش كانسافر و لا فاش كانمشي لشركات كبيرة، ظهور واحد الطبقة ديال الهنود لي شادين بوسطات صحاح و مناصب كبيرة فشركات دولية ! مثلا شركة نوكيا المدير العام ديالها رجيف سوري هندي ! ميكروسوفت عندها ساتيا ناديلا، ماستر كارد عندها آجااي بانگا ! بيبسي كولا عندها ” ايندا نوي ” و بزاف بزاف ديال الشركات غاتلقى المدير العام ديالهم هندي او هندية ! و تحت من المدير العام بزاف ديال المدراء و المهندسين و الأطر هنود ! و الأغلبية الساحقة فيهم تولدو فالهند و قراو فالهند فمدارس هندية و جامعات هندية يعني برودوي 100% هندي من ساسو لراسو و من الهند قدرو يخرجو و يوليو أطر كبار فشركات عالمية.
ايه ديك الهند لي كايعرف عليها المغربي البسيط غير الافلام ديال شاروخان و اميتا باتشان و اشورايا راي …ديك الهند لي بزاف ديال المغاربة كايشوفو فيها الجوع و الوسخ و الحاجة الوحيدة لي كايعرفو عليها هي كايعبدو ” البگر” ! ايه هاديك الدولة لي كايعبدو فيها ” البگر” اليوم كبريات الشركات العالمية كايضاربو باش شي واحد من وليداتها يخدم معاهم…
مؤخرا تلاقيت مع واحد الصديق هندي و جبدت معاه الهضرة على هاد الموضوع، بغيت نفهم علاش وليت كانشوف بزاف ديال الهنود على رؤوس شركات عالمية و علاش وليت كاتشوف اطر هندية و مهندسين هنود فين مامشيت ! و فعلا لقيت جواب واحد و أوحد كلشي كايهضر عليه ” المنافسة”، حيت الهنود كثار بزاف ( فايتين مليار نسمة) فالمنافسة بينهم كبيرة بزاف فالقراية ! گاع العائلات كايدفعو ولادهم يقراو و يقراو مزيان و يقراو بزاف، حيت خاصهم يخدمو و باش يخدمو كايدوزهم المشغل من عين البرا ! ماكاينش ” دفع” ماكاينش ” عدي”، ماكاينش ” غير نجح بسطارطير” كاين القراية و الحرف و المقاتلة على الخدمة ! هاد المناخ كايخلي بزاف ديال الطلبة الهنود يعطيو جهدهم و اكثر ماعندهم باش ينجحو و فاللخر ديال المشوار الدراسي كايكونو تبردو مزيان و ولاو مستاعدين لسوق الشغل، مستاعدين للخدمة و مروديين على الوقت و الستريس و الكفاءة و المردودية و هادشي علاش كايلقاو بلاصتهم بسهولة فالشركات و لامالقاوهاش فالهند عطا الله البلدان لي كاترحب بيهم.
ثاني حاجة اللغة : الهنود واخا كايهضرو بالهندي و البنغالي و الاوردو و شلا لغات اخرى و لكن ختارو يقراو بلونگلي و يخرجو من باب واسع ! أغلبية المدارس كاتقري بلونگلي و الدراري كايتعلمو لونگلي و كايقراو بيها و كايبحثو بيها و كايخدمو بيها من بعد، طبعا الانجليزية ماكانظنش كاينة شي لغة احسن منها فالقراية حيت كاتفتح للطالب الباب على مصرعيه فالبحث و المراجع و حتى نهار كايبغي يخدم لونگلي راه ياكل بيها طرف د الخبز فين مامشا ! فالهند، فالخليج، فميريكان فالنگليز فالمغرب… الانجليزية هي لغة المال و الاعمال و البحث العلمي و التكنولوجيا فالعالم كامل.
هادشي خلاني نسول راسي ! آجي ، علاش حنا شادين بيدينا و سنانا فاللغة العربية كلغة تدريس فالمغرب ؟ علاش مانقلبوهاش انجليزية ( طبعا الفرنسية تبقا تاهي حيت اي لغة زايدة كايتعلمها ولدك راها افونطاج كبير كاتعطيه ليه) و العربية يمكن تولي لغة اختيارية لي بغا يقراها و يقرا قواعد النحو و الصرف و التحويل و لا الشمسية و لا القمرية مرحبا بيه ! و لكن اللغة ديال التعليم الرئيسية تكون هي الانجليزية !
لا بصح نقدر نجيك كانهدرز و لكن حنا دابا علاش كانقراو بالعربية ؟ علاش كانقراو المحفوظات و الصرف و التحويل و الاعراب و إن و أخواتها و كان و أخواتها و ما فتئ و ما انفك … كانضيعو واحد الوقت كبيييير فتعلم شي حوايج لي ماكاينفعونا بوالو من بعد فاش كانمشيو ندوزو ليزونتروتيان فالشركات ؟ علاش كانقراو الماط بالعربية ؟ و السيونس بالعربية و الفيزيك بالعربية ؟ و فاش تبغي شي مرجع فالماط بالعربية ماتلقاهش ! و فاش تبغي تكمل قرايتك و تتخصص فالماط فالجامعة تلقا راسك خاصك تقرا بالفرنسية ؟ علاش اصلا كانقراو الماط بالعربية فالليسي و كانقراو الترجمة بوحدها ! واش ماشي قمة ضياع الوقت و المجهود و الامكانيات ؟ قراو الماط بالعربية و قراو الترجة ديالو للفرنسية!!!! آآو مالنا على حالتنا ؟
ياك التعليم خارية عليه ! علاش ماتكونش شي ثورة فهاد القطاع و تبدا بتغيير اللغة ؟
غاتقوليا لغة الاجداد ! غانقوليك على عيني و راسي و لكن واش غانبقاو رابطين المصير ديالنا بالاجداد و الماضي و لا غانشوفو القدام فالمستقبل شنو يصلاح لينا و شنو يصلاح لولادنا؟
الاجداد الله يعاونهم مشاو فين غانمشيو كاملين ! دابا الفين و تمنطاش هادي ! عصر التيكنولوجيا و الروبو الناس كايشوفو شنو يصلاح ليهم فالمستقبل و حنا شي ناس باغين يربطونا بزز بشي ” اجداد” ماشفناهم ماعرفناهم ماعشنا معاهم ! عاشو وقتهم ! و دابا وقتنا هادي ماغايعيشوهاش تاهي معانا ! هاد الاجداد براسهم كون فاقو ملقبر اليوم غايبقاو علينا بالركيل و البانت حيت مابغيناش نزيدو لقدام حارنين ! محشمين بيهم ! لاصقين ليهم فجلايلهم ! كانمسحو فيهم الفشل ديالنا.
واش بغينا التلاميذ يكونو واجدين لسوق الشغل فالمغرب و فالخارج و لا لا ؟ هذا هوا السؤال لي خاصو يتطرح !
باش كاتفيد العربية التلميذ كونكريطمو فحياتو ؟
غاتقوليا العلاقات مع فرانسا و الفرنسية ! غانقوليك على عيني و راسي و الفرنسية تبقا تاهي ماكاين تا مشكل اي لغة كاتوكل الخبز مرحبا بيها! حنا شنو بغينا من هاد القراية ؟
غاتقوليا هادشي خاصو استثمارات بالملايين و تأهيل المدرسين لي غايقريو بالانجليزية و تغيير المقررات ؟ غانقوليك ايييييه ! هادشي غايكون خاصو مليارات الدراهم و استثمار كبير و عظيم ! و لكن كيما كانشوفو شنو غانخسرو خاصنا نشوفو شنو غانربحو من هكذا استثمار ؟ فحال اي مشروع ! كاينة و لا ماكايناش ؟
الگرمومة هي الحكم فمعركة اللغة ! اللغة لي غاتعاون التلاميذ باش غدا يلقاو خدمة و يديرو بلاصتهم وسط المجتمع مرحبا بيها ! و اللغة لي غير غادي تعمر ليهم وقتهم و ضيع ليهم مجهوداتهم و فاللخر مايقدرو تايخدمو بيها و ياكلو بيها طرف د الخبز خاص تكون الجرأة باش نبعدوها !
و بلا ماينوضو دوك الحماق يغوتو ” وااا عربيتاااااه ” راه تاواحد ماكايتآمر عليكم و لا على عربيتكم ! آجيو نشوفو فين كاينة مصلاحتنا و مصلحة ولادنا ؟ آجي نعطيوهم الأدوات باش ينجحو فقرايتهم و فحياتهم العملية و يكونو مؤهلين غدا يخدمو فشركات عالمية و حتى لامالقاوش طرف د الخبز فالمغرب ! يكون عندهم اوموان اللغة باش يضبرو على راسهم فبلادات اخرى و يسيفطو الدوفيز ! علاه حنا غانبقاو نصدرو غا الحراگة و ليفام دميناج و العاملات الفريز لسبانيا و فرانسا و صحاب الاعمال اليدوية ؟ مانقدروش تاحنا نطلعو النيفو ديال المهاجرين و نشوفو فيهم اطر و مهندسين و مدراء شركات عالمية ؟
التعليم خاصو قرارات جريئة و شي مرات حمقة گاع !! بعيدة كل البعد على الايديولوجيات الدينية و الحسابات السياسية ! راه ماكاينش لي غايخرج على التعليم و غايساهم فتفاقم البطالة قد دوك السياسيين لي شادين مستقبل المغرب و اطفال المغرب رهينة بين يديهم لي كايقتاتو من فحال هاد القرارات ديال ” التعريب و العربية ”
آطونسيو راكم كاتبيعو و تشريو فمصير الملايين من الشباب غدا لي غايموتو بالجوع بسبابكم ! و غايلقاو راسهم غير مؤهلين لسوق الشغل !! آطونسيو راه المغرب دابا فيه ربعين مليون نسمة يعني مازال كاين مايتعتق ! ماغاديش نساينو تانوليو ثمانين مليون و لا ميات مليون جيعان و متشرد و عاطل عن العمل عاد نبقاو نغوتو يا ندامتي يا راسي.
لغة التعليم خاصها تتبدل بوان فينال.