بلاد تبون باغية ضارب مع كلشي. بعد قطع علاقاتها الديبلوماسية مع المغرب. استدعاء سفيرها ففرانسا للتشاور بسباب عبارة ماكرون: واش كاينة امة جزائرية؟ والرئيس حاصل داخل نظام عسكري سياسي صعب

استقبال مدتو ساعتين نهار لخميس اللي فات ل18 شاب فرنسي من اصل جزائري لمناقشة "مصالحة الشعوب" و"جرح الذاكرة" دارو الرئيس الفرنسي ماكرون بالاليزي نوض العافية. فقد استدعت الجزائر سفيرها بباريس محمد عنتر دواد للتشاور. بيان لرئاسة الجمهورية الجزائرية ما قالتش علاش. وقال باللي غادي يخرج بيان فهاد الشي ولكن كلشي عارف باللي بسباب تصريحات ماكرون قدام هاد الشباب.
ماكرون قال باللي عندو علاقة مزيانة مع الرئيس الجزائري تبون ولكن ضاف باللي هاد الرئيس "حاصل داخل نظام عسكري سياسي صعيب".
كما تحدث وفق ما نقلته "لوموند" عن غياب امة جزائرية قبل الاستعمار الفرنسي وتساءل "واش كانت شي حاجة اسمها امة جزائرية قبل الاستعمار الفرنسي. راه هادا هو السؤال"، كيف قال. واوضح باللي كان استعمار فرنسي وقبلو استعمار تركي٬ غير انه ابدى اعجابو بقدرة تركيا تخلي الشعوب تنسى ماضيها الاستعماري "راني مفتون برؤية قدرة تركيا اللي كتخلي الناس تنسى تماما دورها فالجزائر والهيمنة اللي مارساتها. وصلو باش يخليو الجزائريين يصدقو ان الاستعمار الوحيد اللي عاشوه هو الاستعمار الفرنسي".