هادي خصها استنفار.. اللجنة العلمية ل"كود": كثر من 4 مليون مغربي مابغاوش يتلقحو غادي يرونوها علينا وحنا مضطرين نرجعو للحجر الى دخلات 5000 حالة للإنعاش

استغرب عدد من أعضاء اللجنة العلمية حول اللقاح، هاد قصوحية الراس عند بعض المواطنين لي مبغاوش يديرو التلقيح، اللي وصل عددهم تقريبا 4 مليون مغربي مبغاوش يمشي يديرو التلقيح.
بلغة الأرقام، كشف عضو فاللجنة العلمية ل"كود" أنه :"لا يعقل ف 3000 مركز للتلقيح، يوم أمس تلقحوا فقط 500 واحد وحنا مهددين بالمتحور الجديد، وفي نفس الوقت بفرنسا أكثر من مليون شخص خداو موعد للتلقيح في فرنسا".
وأوضح ذات المصدر ل"كود" :"هاد 4 مليون ونص اللي متلقحوش غادي يرونوها علينا "، مضيفا :"عندنا 5500 سرير انعاش، وفي فرنسا كيقول البروفيسور كوهين بأن "فرنسا كاملة عندها 7500 سرير انعاش".
وتابع المصدر نفسه :"غير يلا دخلت 5000 واحد للانعاش ضمن ذيك 4 مليون لي مبغاتش تلقح، غادي نرجعو للحجر الصحي.. ".
وشدد المسؤول نفسه بالقول :"حنا ف حرب وحنا مامحتاجينش كاع نجبدو الدراسات العلمية، نتوما عرفين اشنو وقع ف تونس لي كيموتو فيها 200 ف نهار، ولا كيفاش حمينا الارواح باللقاح ف الموجة ديال دلتا، بحيث لي ماتو قلال واغلبهم ماداروش الفاكسان".