المسؤول الاول على الاحتجاجات ضد "الباص ڤاكسينال" هو ايت الطالب. الوزير اللي رجع بطريقة عبيثة وزير حرق "النجاح" اللي دارو محمد السادس فالتلقيح بغباؤو وقراراتو الانفرادية اللي ما عندها معنى

تصورو قمة العشرين اللي جمعات الدول لمرفحة فالعالم فايطاليا فهاد الويكاند٬ كانت من قراراتها دعم الدول الفقيرة باللقاح. العالم بالنسبة لهاد القادة ما يمكنش يرجع كيف كان بلا تلقيح الدول الفقيرة بنفس النسب ديال الدول الغنية. عاب قادة كيفاش هاد الدول وصلات للجرعة الثالثة وشي دول فقيرة مازال ما دارتش الدوز اللولى. اللي تابع هاد النقاش على الڤاكسان فقمة العشرين غادي يقول "المغرب دولة غنية". قربنا تقريبا لتلقيح نسبة تخلينا نوصلو للمناعة الجماعية =اكثر من 60 بالمائة من السكان= ودابا كاينة قرابة 2 مليون مغربي دار الدوز الثالثة. اييه.
هاد الشي ما دارش صدفة. ما داروش وزير الصحة ايت الطالب. ما دارتوش الحكومة اللي فاتت او هادي. هاد النجاح المغربي الكبير داروه اجهزة سيادية فالدولة باشراف مباشر من رئيس الدولة الملك محمد السادس.
قصة نجاح مغربية حقيقية. كطلع المورال. شوفو الجيران وشوفو حتى دول اوربية وقارنوها باللي وصلنا ليه. لكن هاد القصة النجاح لكبيرة والرائعة كيضرب فيها كيحرق فيها وزير اسمو خالد ايت الطالب. هادا اللي كان مشى من الحكومة مع نهاية ولاية الحكومة السابقة٬ رجع بعد اسبوع فمشهد من المسرح العبثي٬ لمنصبو.
باش رجع تصرف تصرفات لعبات دور كبير فمسيرات البارح فعدد من المدن المغربية خاصة الرباط وكازا وطنجة.
كيفاش؟
كان مشكلة كيتحمل هو جزء من مسؤوليتها فقضية بطء عملية التلقيح قبل اسبوعين. باينة كان شي اتصال بيه من الفوق. عوض ما يتصرف كمسؤول وينسق مع علي الاقل وزارة الداخلية والناطق الرسمي باسم الحكومة على قرارات ويتم تصريفها بشكل ذكي خاصة ان بلوغ المناعة الجماعية راه مطلب لمغاربة كلهم باش يرجعو لحياتهم الطبيعية بتدرج٬ عوض هاد الشي. جا للتلفزيون كيعلن علي اجراءات غبية وكلها كتضرب قصة النجاح المغربية.
خلق هاد لوزير لبس باش اعلن على فرض الباص فاكسينال. خلق لبس باش قال باللي اللقاح بعد 6 اشهر ما مقبولش. خلق لبس باش بان فالتلفزيون. كلشي تخلط. كلشي ما فاهم والو. حتى اللي دارو الڤاكسان وب3 دوز تلفو.
كيفاش قضية كتهم لمغاربة كلهم تعطى لهاد لوزير. اجبارية التلقيح كان خاصها بزاف البيداگوجي وخاصها الاقناع. قضية يقبلوها لمغاربة. ثم ما يمكنش تجي عند شي شعب وتقول ليه راه اجبارية التلقيح وتفرض عليه يدخل مع لحداش. بزافت لحوايج ما راكباش. فضيحة تواصلية كبيرة يتحملها الوزير بوحدو واخا عضو فالحكومة. لانو هو بغى يلعبها بوحدو النهار الاول. حتى باش تخربقات عاد خرج السيمانا اللي فاتت مع وزير العلاقات مع البرلمان الناطق الرسمي باسم الحكومة فندوة بعد المجلس الحكومي. كان طروطار. فات الفوت.
بداو اللي ضد الدولة ماشي ضد الحكومة كيوجدو باش يشربو هاد الدولة. بداو الاعداد لوقفات.
اللي وقع البارح جزء كبير منها نتيجة لتدبير كارثي للتعامل مع المغاربة بداها وزير الصحة وحتى حد فالحكومة ما قدر يصلح ما يتم اصلاحو.
وزير صحة بحال هاد ايت الطالب كيخربق ويشوش ماشي على قرارات الحكومة اللا. على قرارات الدولة. على قرارات رئيس الدولة.
دابا باش رون كلشي مشى تخبي. داز عند صحابو وما يلقى ما يقول الا غادي نفتح تحقيق على خروج وثائق نشراتهم "كود" فتحقيقها. يعني مخلي كلشي وماديها فقضايا دار فيها البرلمان السابق لجان استطلاعية ووقف على امور خطيرة.
دابا كرة ثلج الاحتجاجات غادية وتكبر. من مصلحة المغرب يبكد شخص بحال هاد ايت الطالب على الحديث مع لمغاربة. ماشي محبوب. باش كيبان ما كيحسوش المواطنين معاه بالراحة كيف كانو كيحسو مع وزير بحال الحسين الوردي للي كان فالصحة قبلو. ما فيدوش لا فالتواصل لا فالبيداگوجيا لا فالسياسة لا فتدبير قطاع مريض بحال الصحة. داخل فحروب مع كاع مناديب القطاع فالمغرب.
هذا قطاع حيوي. خاصو شخصية كتشوف بعيد. ماشي مقابلة لي النميمة فالتلفونات مع شي صحافيين. هاد الشي راه ديال الترعوين ماشي ديال رجال الدولة.