غادية وكتحماض فأوروبا.. حكومات عدد من الدول عاود زيرات الطرح بإجراءات احترازية جديدة لمواجهة "أوميكرون"

قررات حكومات عدد من الدول الأوروبية تعاود تزير وتفرض قيود احترازية لمواجهة انتشار السلالة الجديدة ديال فيروس كورونا "أوميكرون" فجميع أنحاء القارة.
ورجعات دول أوروبية، أبرزها ألمانيا والبرتغال، فرض قيود جديدة ما بعد عطلة "نويل" (كريسماس) وراس العام، منها إجراءات ديال تباعد اجتماعي بصرامة أكثر.
دبا ولى متحور "أوميكرون" هو السلالة السائدة من فيروس كورونا فبزاف ديال البلايص فأوروبا.
وعلنات إسبانيا تسجيل أكبر معدل يومي للحالات الجديدة منذ بداية انتشار الوباء، فالوقت اللي السلطات الفرنسية كتحذر من إمكانية يفوتو حالات الإصابة عندهم مستوى 100.000 حالة.
وقال وزير الصحة الفرنسي، أوليفيير فيرون، بللي ارتفاع العدد اليومي للحالات الجديدة فبلادو إلى 70000 حالة يوميا هو بسباب سلالة "أوميكرون" اللي كيقولو أنها فالغالب غاتكون هي السلالة ديال كورونا اللي غاتزيد تحيح و تنتاشر بزاف من هنا البدية ديال العام الجاي.
وحذر هانز كلوكَ، مسؤول منظمة الصحة العالمية فأوروبا، من أن الزيادة فحالات الإصابة بمتحور "أوميكرون"،غادي يدكَدكَ الأنظمة الصحية الأوروبية.
وقال كلوكَ بللي "عاصفة أخرى" جاية وخاص الحكومات توجد مزيان للزيادات الكبيرة اللي غاتعرفها حالات الإصابة بالفيروس.