مغرب جديد خرج من البير اللي تجبد منو الطفل رايان. وفاتو صدمة خرجنا منها بمغرب مفتاخر براسو وثايق بامكانياتو: جمع بين تقاليدو فالتآزر ديال عمي الصحراوي وتحكمو فالعلم والتكنلوجيا

ليلة البارح 5 فبراير 2022 مع التسعود ونص تعلن رسميا وفاة الطفل رايان 5 سنوات. الطفل اللي طاح فبير فغفلة من بوه هادي 5 ايام وبقى حاصل 32 ميترو تحت الارض حتى وصلو ليه البارح فالعشية. هاد الشي وقع فاغران باقليم شفشاون. وصلو ليه بعد جهد خرافي شارك فيه حفار لبيار مع الطوبوگراف مع التقني مع المهندس. دارت اوركسترا مغربية خاصلة. تجمعات بين تقاليدنا العريقة فالتضامن والتأزر مع المعرفة اللي جابتها ليها التكنلوجيا الجديدة. هادو عزفو سنفونية خارجة من الروح المغربية.
هادا هو اللي بهر العالم. مغرب كولو خدام ليل ونهار بلا توقف باش يوصل للطفل ريان. باش يجبدو. باش ينقدو.
مغرب التضامن هادا اللي ما خطاوهش بارازيت بحال كيوقع فالحياة٬ كان سند لوالدي ريان: خالد اورام ووسيمة خرشيش حتى العزاء كانت لحظة مغربية كبيرة. الملك محمد السادس هو اللي عزاهم الاول تصورو من لثلاث تشكلات لجنة تتبع وإنقاذ فعمالة إقليم شفشاون. هاد اللجنة هي اللي شرفات على تنسيق جهود التدخلات. حقاش كانت كثيرة ماشي غير تدخل واحد. فيها البومبية والجدارمية وناس السلطة المحلية والمسعفين والمتطوعين من الهلال الاحمر والاطبا والمهندسين والتقنيين والممرضين.
جات الاليات الثقيلة. دارت كل خدمتها باش تنقد رايان. رسلو ليه الما والاوكسجين. جربو جوج مرات يهبط عندو شي حد ووالو. دارو لطريقة اخرى وهو يحفرو بالتوازي مع البير على بعد 150 ميترو باش ما يريبش البير اللي محفور بالسوندا. بعد 32 مترو دارو حفرة افقية.
خلال هاد الخمسة ايام كانت توقف الاشغال بسباب انهيار التربة او تواجد لحجر والصخر. هاد الناس تحداو كلشي ووصلو ليه البارح فالعشية. كان حفر سنتمترات كيوصل لدقايق كثيرة. هاد الشي تحت لارض. الفوق كانت اشكال اخرى من التضامن. عيالات الدوار كيوجدو المالكة والشراب لهاد العمال ولهاد الابطال. قنوات العالم كتنقل الحدث دقيقة بدقيقة.
طبعا كيف قلنا كان البارازيت. كائنات باغية تقتات من هاد الحدث. هادوك اللي خلاتهم السلطات وتسامحات معاهم.
فظل هاد الاجواء وقعات اخطاء فالصحافة، تنشرات اخبار زائفة.
لكن من هاد الشي كولو. المغرب بين لراسو باللي قادر على التحدي. شفنا المشارقة حاسدينا وكتبو شعار غادي يولي مغربي "على قبل طفل ريبو جبل". هادا خلى المغربي يفتاخر براسو.
اليوم 6 فبراير 2022 مرحلة جديدة لمغرب جديد كيتشكل. مغرب خرج من العالم الثالث ودخل لعالم نامي. مغرب بكل نقائصو فالتعليم والصحة٬ قادر يهز الراس بالاعتماد على الذات. هاد الشعور الجماعي من غيرو قيمتو كلحمة لشعب كامل٬ راه كيخلي المغربي يفتاخر بتمغرابيت ديالو.
رايان كشف معدننا. معدن كان خاصو يتنحت فجبل باش نوصلو ليه. كنعرفو صعوبة النحت فالجبال.
هاد الشعور سبقاتو احداث تخليك مفتاخر براسك. اعتراف امريكا بمغربية الصحراء. تولي من كبار مصنعي الطونوبيلات فالعالم. تصدر الماسكات فالوقت اللي العالم كان تالف يلقاها ايام كورونا. تنجح فالڤاكسان وتلقح اكثر من 24 مليون مغربي وتعطي انطلاقة مصنع للقاحات غادي يغطي 70 بالمائة من الاكتفاء الذاتي للمغرب و60 بالمائة لافريقيا ويكون عندك تي جي في فلائحة الترانات 10 الاسرع فالعالم...... واللائحة طويلة.
مع رايان كانت دفعة اخرى ربما الاخيرة لدخول المغرب مرحلة جديدة. مرحلة كشفات تخليطة ملامح هاد المغرب الجديد. خاصو يكون متمكن من اليات التحديث وعندو العلم والمعرفة بلا ما يفرط فقيم التآزر اللي مثلها امثال عمي الصحراوي.
هاد الشي كيشبه تجارب سبقاتنا وولات من مصاف الدول الاكثر تطورا فالعالم. اليابان مثلا. علاش اللا. كلشي ممكن ايلى بغينا كلنا