بوريطة كيطنز على لمغاربة بغباء. قاليك فتح الحدود مرتابط بضمان صحة المواطنين. كلشي اللي قلتيك ماشادش وعبثي واما ديك "بلدان فتحات وبدات كتراجع" فراها فايك"

ناصر بوريطة وزير الخارجية والتعاون باغي يبان فاي موضوع عليه الضو. عارف ان فتح الحدود من اغلاقها ماشي موضوع ديالو. هادا موضوع وزير الصحة وطبعا رئيس الحكومة وفوق هاد الشي رئيس الدولة.
دابا هو البارح مشى للبرلمان وعطاها للخرايف. قال باللي "فتح الحدود أمر مهم لكنو مرتابط بتوفير الشروط الضرورية لصحة الوافدين والمواطنين المغاربة". ايلى فهمتو شي حاجة قولوها لينا.
دابا العالم كولو فاتح حدودو ودول سالات حتى مع بعض الاجراءات اللي كانت معتامداتها قبل بحال بريطانيا او فرانسا ما بقاش مطلوب منك البي سي ار او غيرها. كتدخل كتعمر ورقة وكتجيب الباك سانيتير او ڤاكسينال.
الوزير باش كيقول هاد الهدرة ديال "توفير الشروط الضرورية" لضمان صحة الزوار والمواطنين المغاربة على حد سواء" راه كيطنز. ماشي حقاش ماشي موضوعو ولكن لان كلامو انشائي سطحي.
المغرب سد الحدود لانو ما كانش عارف هاد اوميكرون. باش عرفو وعرف باللي ماشي بالخطورة اللي توقعات حتى منظمة الصحة العالمية٬ كلشي دول العالم فتحات الا هو بقى ساد.
رجع وقال تفاهات غير علمية. قال كل دولة كتاخد التدابير بناء على الوضعية اللي عندها وبدا يعطي ارقام. اولا انت ماشي متخصص فهاد الشي، ثانيا اعضاء فاللجنة العلمية بحال الابراهيمي شرح لامثالك وبالخوشيبات علاش خاص تفتح الحدود٬ ثم حتى اللجنة الوزارية المشتركة اللي فيها الخارجية هدرات على هاد الموضوع.
طبعا الفايك اللي قالو الوزير فالبرلمان٬ هو باش قال "كنشوفو دول حلات هادي اسبوع او اسبوعين وبدات كتراجع". حتى دولة ما تراجعات. اللي حلات فالفترة اللي كيهدر عليها الوزير هي اسرائيل اللي من 9 يناير رجعات فتحات حدودها للسياح. غير اللي ما عمرو بغى يقر بيه انو ما كاينة حتى دولة فالعالم سدات على ناسها. رفضات ترجع ناسها لبلادهم. اسرائيل واليابان سدو حدودهم باش بدات "اوميكرون" على الاجانب ورجعو جميع المواطنين ديالهم.
دابا هاد الوزير علاش وظف هاد الفايك واش بغى يقول منها.
كان يسد فمو الموضوع ماشي ديالو. كيضحك على هادوك 6 مليون من اصول مغربية اللي قطعات الدولة علاقتهم بيهم بعد ما دارت هاد السدة الطويلة الغبية غير المبررة نهائيا