جديد عصابة التسمسير فملفات قضائية فكازا.. نائب الوكيل المشدود ومعه القاضي عندهم علاقة بريزو هشام "الوسكي" والتحقيق مابداش بسباب الأوديو

هاد "الفيلم" ولا يمكن "مسلسل" طويل بعنوان "التسمسير فالقضاء" كيبان بللي ماغاديش يسالي مزيان ومزال كيبان أنه غادي يطيحو فيه ريوسا كبار منهم رئيس المحكمة الابتدائية الزجرية بعين السبع اللي قالت مصادر "گود" انه غادي يسمعو ليه قضاة من محكمة النقض فالرباط بسباب الامتياز القضائي بشبهة الفساد والخيانة الزوجية من بعد ما اكدات نفس المصادر أن السيدة دالميناج عندها شي علاقة مع نائب وكيل الملك بالمحكمة الابتدائية الزجرية بعين السبع اللي مشدود دبا بتهمة تكوين عصابة إجرامية متخصصة في الارتشاء والتزوير في محاضر رسمية والخيانة الزوجية والاتجار بالبشر.
وحسب المعطيات الحصرية اللي طاحت عليها "گود" فراه هاد الريزو عندو علاقة بريزو هشام لوسكي المضروب ابتدائيا ب8 سنين واستئنافيا ب5 سنين، وهاد التحقيقات غير كمالة بداتها الفرقة الوطنية للشرطة القضائية بالدار البيضاء من عام 2020.
ووفق المعطيات ديالنا من دائرة التحقيق فراه المكتب الوطني لمحاربة الهجرة غير الشرعية التابع للفرقة الوطنية للشرطة القضائية بالدار البيضاء خذا الاذن من الوكيل العام للملك ديال محكمة الاستئناف بالدار البيضاء باش يتصنتو على التلفونات ومن ذاك الوقت وهما متبعينهم المكالمات كانت كلها جنس ورشاوى مقابل تدخلات فملفات معروضة قدام القضاء.
وتقدم قدام الوكيل العام للملك بمحكمة الاستئناف بالدار البيضاء 28 شخص منهم اللي تابع فحالة إعتقال ومنهم اللي فحالة سراح، ومزال غادي يكون زلزال أكبر من هذا فالقضاء وتحديداً فعين السبع وراه مزال المفتشية العامة التابعة للمجلس الأعلى للسلطة القضائية كتحقق فالامر.