جديد ريزو التسمسير فالقضاء.. اليوم تقدمو جوج نواب ديال وكيل الملك فمحكمة عين السبع قدام الوكيل العام فكازا و"گود" طاحت على التفاصيل

مزال الخيوطة مخبلين ديال هاد خيلوطة التسمسير فملفات المحاكم وبالخصوص داكشي اللي كيوقع في المحكمة الابتدائية الزجرية لعين السبع.
وفي هذا السياق كشفات مصادر "گود" أن عناصر الفرقة الوطنية للشرطة القضائية بالدار البيضاء قدمو اليوم الثلاثاء قدام الوكيل العام للملك فمحكمة الاستئناف ديال كازا جوج نواب وكيل الملك آخرين من نفس المحكمة ديال عين السبع من بعد ما ثبت التورط ديالهم فالتسمسير والتخلويض فحقوق الناس وملفاتهم.
هاد الجوج لي تقدمو فحالة سراح كيجيو من بعد الاحالة في حالة اعتقال على قاضي التحقيق نائب مارس الجنس على منظفة من الدبر فالمكتب ديالو، ومارس معها حتى فالواتساب اي الجنس عن بعد، ومتهم بتكوين عصابة إجرامية متخصصة في الارتشاء والتزوير فوثائق رسمية والوساطة لدى موظفين عموميين والخيانة الزوجية.
هاد الشي مجاش غير بسباب الأوديو لي تسرب، بل الاوديو كان غير النقطة لي فيضات الكاس كيف كيقولو. على حساب ما قالت مصادر "گود" الملف كيتخدم فتحقيقات من 2021 بعد تفريغ محتوى مكالمات هاتفية كتورط هاد الناس.
هاد الشي مزال غيجبد شلا حوايج وهاد الريزو كيبان انه عندو ريزوات لي غادي تبان فحملة التطهير.