واش كاين فيها التخرميز؟. اونكيط جديدة تفتحات على التوظيفات ف"ENCG" سطات.. و"گود" جابت التفاصيل كاملة

من بعد سنوات ديال منطق التوظيفات لي كانت عليها هضرة كثيرة فجامعة سطات، خصوصا، ديك الروينة لي تدارت فكلية العلوم القانونية والاقتصادية والاجتماعية، كاينة شي فضيحة أخرى تقدر تنفجر فالمدرسة الوطنية للتجارة والتسيير ، وغادا تجر مصايب على مسؤولين كثار إلى تأكد صحة هضرة وجود توظيفات مشبوهة وبانت حريرة تفاصليها.
وفهاد السياق، كشفات مصادر ل "گود"، أن مدير المدرسة الوطنية لتجارة والتسيير بسطات قرر يفتح أونكيط إدارية بعدما طفت على سطح الأحداث ملف تخلويض مفترض في ملف التوظيفات ديال باك صاحبي بالمدرسة التابعة لجامعة سطات.
المصادر ذاتها قالت ل"كود" أن أخبار قوية تتروج على أن الفرقة الوطنية للشرطة القضائية فكازا مزال فاتحة التحقيق في الخماج ديال جامعة الحسن الأول فسطات، وخصوصاً ذاك اللعب لي تلعب في ملف "الجنس مقابل النقط".
مصادر خاصة من داخل المدرسة الوطنية للتجارة والتسيير فسطات، كشفت أيضا، ل "گود" أن گيرة نايضة على بوسط أستاذ جامعي مساعد غادي تكون المباراة عليه نهار الخميس الجاي.
ومن ضمنهم، على حد ما وصلات ليه "گود" ديما من المصادر ديالها، مترشحين لي كيحتجو على هاد الوضع، وغادين يحطو، اليوم الاثنين، جوج شكايات وحدة إدارية غادا توجه للإدارة المدرسة، والأخرى مباشرة للنيابة العامة بالمحكمة الابتدائية ديال سطات.
هاد الملف غادي يقدر يجبد نحل آخر على ملف التوظيفات لي عرفاتها الجامعة كاملة من 2019 لدابا.
ووسط هاد القربالة، مزال جاي صهد آخور وصداع على قبل الترشيحات ديال عمودية وإدارة المؤسسات الجامعية ومعاه الحرب لي غادا تنوض على رئاسة الجامعة وشكون غادي يجي في بلاصة الرئيسة.