بداو كيتفاصلو على البوسط.. مدير مركز الدكتوراه فجامعة سطات باغي يولي رئيس جامعة واتصل بالنواب المفترضين ديالو

يالاه دازت 24 ساعة على فتح الباب ديال سحب الترشحات لرئاسة جامعة الحسن الأول من بعد ما عفى عبد اللطيف الميراوي وزير التعليم العالي والبحث العلمي والابتكار خديجة الصافي بسباب ملفات "الجنس مقابل النقط" و"المال مقابل النقط" والتوظيفات المشبوهة، ناض شخص كلشي كيتشكى منو باغي يولي رئيس وموجد حتى الصطاف ديالو.
مصادر كشفات ل"كود" ان المعني بالأمر هو نائب مدير المدرسة الوطنية للتجارة والتسيير وهو المسؤول على الدكتوراه في الجامعة.
ومصادر خاصة من داخل جامعة سطات قالت ل"گود" ان هاد السيد عندو علاقة بواحد المؤسسة سميتها اكاديميوس پريڤي أي القراية فيها بالخلاص وكتعطي شهادة الدكتوراه فالتسيير كتجي موقعة من فرنسا وكاين ملفات توظيف يقدر يكون ضغط فيها على لجان باش يوظفو لي بغى.
مصادر "گود" كشفات على حاجات خطيرة من بينها التلاعب لي وقع في الكونكور ديال عمادة كلية الاقتصاد والتدبير فسطات لي كان في اللجنة ديالها، ووركو باش يكون الترتيب بالمقلوب.
المهم هاد الفيلم ديال الرئاسة فيه بزاف مايتقال ومزال "گود" غادي تهضر على گاع المرشحين المحتملين.. لي زين زين ولي مافيدوش راه مافيدوش.