أكد الدولي المغربي نايف أكرد لعاب ويستهام الننكليزي أنه جاهز باش يشارك مع المنتخب الوطني المغربي فكأس العالم المقبلة فقط، ولو أن الحظوظ ديال ليكيب ناسيونال بالمقارنة مع المنتخبات اللي معها فالمجموعة كتبقى قليلة فالتأهل للدور الثاني. نايف أكرد خلال حوار جراه مع شبكة "كنال بليس" الفرنساوية أكد أن الإصابة اللي تعرض لها قبل أشهر كانت صعيبة عليه، لكن كان عليه يتقبل الواقع ويركز فالعلاج والخدمة والدليل أنه واجد دابا باش يلعب مع ويستهام ومع المنتخب الوطني المغربي. بخصوص مشاركة المنتخب المغربي فكأس العالم قال نايف أكرد: "حنا ماشي فافوري باش نتكاليفاو للدوزيام تور، حيث الكروب ديالنا فيه بلجيكا وكرواتيا وكندا، وهاذو منتخبات قوية بزاف، لكن ما خاصهمش يحكرونا". وكمل نايف أكرد الكلام ديالو على ليكيب الناسيونال وقال: "المشاركة ديالنا فكأس العالم للمرة الثانية كتدل بلي الجامعة الملكية المغربية لكرة القدم دارت خدمة كبيرة هي والمدرب السابق وحيد خاليلوزيتش، أمام المدرب الجديد وليد الركراكي راه كنعرفو من شحال هاذي، وهو اللي دخلني للاحتراف ملي كان عندي 17 عام، وغادي يعطي الثقة لكروب واللمسة فاللعب" نايف أكرد رسل ميساج حتى اللعابا الشباب وقالهم يجتهدو فالدراسة ديالهم ويهتمو باللغات، كيفما كيهتمو بكرة القدم، حيث غادي تسهل عليهم بزاف ديال لحواج فالكاريير ديالهم كيفما هو استفد منها للاحتراف ديالو وفسرعة الاندماج مع الفرق اللي لعب معها وسهلات عليه يتفاهم مع المدربين اللي دربوه واللعابا اللي كيلعبو معاه.
