"رجاء أسيرونس" ماشي فكرة البدراوي وها مول المشروع

تبين أن فكرة مشروع الخدمة اللي طلق رئيس الرجاء الرياضي عزيز البدراوي ديال التأمين حتى هي ماشي وفحالها فحال عدد من المشاريع اللي بداها المكتب السابق ديال الخضرا.
وثائق تحصل عليها موقع "كود" كتكشف بلي فكرة مشروع خدمة لاسيرونس اللي طلقها الرجاء الرياضي للرجاويين واللي كتوفر التأمين على الطونوبيلات والشركات والديور وغيرها، مقابل استفادة الفرقة من مدخول ورا تقديم هاذ السيرفيس، هي فالأصل ديال المكتب السابق للنادي برئاسة الرئيس السابق أنيس محفوظ.
وتأكد مرة أخرى أن "رجا أسيرونس" وهذا هو اسم خدمة التأمين اللي طلقها الرجاء مؤخرا للرجاويين، حتى هي كترجع الفكرة ديالها والتخطيط لها لأنيس محفوظ الرئيس اللي قدم استقالتو بشكل مفاجئ وأعضاء المكتب اللي كانوا معه وبالتالي فبحالها بحال صفقة المستشهر ديال القمر "1XBET" وشركة الألبسة الرياضية الجديدة اللي تعاقد معها النادي كلهم من الخدمة والتخطيط ديال أعضاء المكتب السابق للرجاء حيث كانوا خدامين على مشاريع ديال المدى القصير والمتوسط والبعيد قبل ما يقررو يديرو الخاطر للجمهور ويقدمو الاستقالة ويمشيو بحالهم وخلاو هاذيك المشاريع كخدمة منهم للرجاء كنادي.
وطلق الرجاء الرياضي مؤخرا خدمة جديدة للجمهور ديالو باش يدخل شويا ديال الصرف، حيث الفرقة كتعاني من أزمة مالية صعيبة وتبين أن فلوس الرئيس عزيز البدراوي بوحدها ما كفياهش باش يدخل مشاكل النزاعات مع اللعابا السابقين اللي كيتسالو مستحقات للفرقة وباش يدير أيضا انتدابات فالميركاتو اللي جاي حيث اللعابا اللي سنا معهم فالصيف ماعطاوش الاضافة، وبالتالي لجأ رئيس الخضرا للجمهور مرة أخرى باش يجيب مداخيل جديدة كيفما دار فبطائق الإشتراك وبطائق الأداء على المشتريات.