وزيرة داخلية لالمان فرشات نفاق أنفانتينو رئيس الفيفا بسبب المثليين

حراجات وزيرة الداخلية الألمانية نانسي فيزر رئيس الاتحاد الدولي لكرة القدم جياني أنفانتينو، وخلاتو يبان منافق قدام القطريين وقدام المجتمع الدولي بسبب قضية المثلية الجنسية.
وزيرة داخلية لالمان حضرت ماتش منتخب بلادها البارح ضد الجابون، وهي لابسة شارة "one love" اللي فيها قلب وسطو ألوان قوس قزح رمز المثلية، وهي الشارة اللي منعتها "الفيفا" وأنفانتينو على اللعابا فالمنتخبات اللي مشاركين فمونديال قطر ما يلبسوهاش وإينفانتينو خرج يبرر، وقال بلي خاص كلشي يحترم ثقافة قطر اللي منظمة البطولة، والأكثر من هادشي تمنعو المشجعين حتى هما من دخول التيرانات إلى كانوا لابسين شي حاجة فيها الألوان ديال قوس قزح، حيث قطر كتجرم المثلية الجنسية.
جياني إينفانتينو اللي كان كيدافع على قطر ضد الأوروبيين فبزاف ديال الحوايح، ومنها تجريمها للمثلية، ومن بعدما ضمن انطلاق المونديال فقطر فأحسن الظروف بدا دابا كيحاول يصلح علاقتو مع الدول الأوروبية، حيث الانتخابات ديال "الفيفا" قربات وخاصو يحزرهم ويبين لهم بلي هو مع الحريات الفردية وكيتحرم كلشي كيفما قال فمؤتمر افتتاح كأس العالم، حيث الأوروبيين وزنهم ثقيل فكواليس "الفيفا"، وهاد المرة حاول يستغل وزيرة داخلية لالمان اللي هازا شعار المثلية الجنسية وتصور معها ومع شعار المثليين، زعما كيقول للاوروبيين راه انا معاكم غير داير للقطريين خاطرهم، ولكن هاد القضية كانت ضدو حيث بزاف من جمهور الكرة فالعالم نعتوه بالمنافق، وفيهم الأوروبيين اللي كيدفعو على المثلية والقطريين اللي ضدها.
جياني إينفانتينو تحرج بزاف خصوصا أن الماتش اللي وقع فيه هادشي كان فيه احتجاج من منتخب لالمان على "الفيفا"، وتصورو اللعابا ديالو وهما حاطين يديهم على فامهم، حيث الإتحاد الدولي لكرة القدم اللي الرئيس ديالو إنفانتينو منع اللعابا فكأس العالم قطر 2022، يلبسو شارة "one love" المدافعة على المثليين فخاطر قطر اللي منظمة البطولة.