الركراكي اللي كتعجبو "لافوكا" صبح أول مدرب مغربي كيربح فالمونديال

صبح الناخب الوطني وليد الركراكي أول مدرب مغربي يربح ماتش فكأس العالم، وهادشي من بعدما ربح المنتخب الوطني المغربي منتخب بلجيكا اليوم الأحد فالجولة الثانية من مونديال قطر 2022.
وساهم وليد الركراكي بشكل مباشر فالرباح ديال المنتخب الوطني المغربي هو والطاقم التقني اللي معاه، حيث من بعدما سالا الشوط الأول تعادل، عرف كيفاش هو اللعابا يحسمو الأمور فالشوط الثاني بتغييرات شجاعة، واخا خرجو له شي حوايج من الجنب اللي ما يبغيهم حتى مدرب، فحال الإصابة ديال ياسين بونو بلحظات قليلة قبل الماتش والإصابة ديال أشرف حكيمي اللي توعت وخرج فالشوط الثاني، ولكن بالكوتشينك اللي دار والطريقة اللي وجد بها هو وصطاف اللي معاه اللعبابا كاملين الرسميين والاحتياطيين خلات المنتخب المغربي يخرج رابح بنتيجة 2 لزيرو ضد بلجيكا المصنفة فالمركز الثاني فالترتيب العالمي.
الركراكي اللي ما كيتقلقش ملي كيتنمرو عليه المنتقدين ديالو ملي كينعتوه براس "لافوك" ولات عاجباه ودخلها هو ولا كيقولها باش يطنز على عليهم، قدر يخلق الفرحة بقلوب المغاربة اليوم مدرب بلجيكا وربح روبيرتو مارتينيز واحد من أحسن المدربين فالعالم، وطلب من المغاربة يتيقو فيه فاللعابا ويشجعوهم حيث كيتقاتلو على قبلهم فكأس العالم.
وبهاد الرباح صبح وليد الركراكي اللي هو ثاني مدرب مغربي كيلعب المونديال من بعد الراحل عبد الله بليندا، (صبح) هو أول مدرب مغربي كيربح ماتش فكأس العالم و كياخد 3 النقاط، من بعدما خدا أول نقطة ضد وصيف بطل العالم كرواتيا الماتش اللي فات.