المغرب دخل التاريخ وتأهل لأول مرة لنصف النهائي من بعدما ربح البرتغال فماتش بطولي

تأهل المنتخب الوطني المغربي لأول مرة فالتاريخ ديالو لنصف نهائي كأس العالم، من بعدما ربح اليوم السبت فماتش بطولي وتاريخي منتخب البرتغال فربع نهائي مونديال قطر 2022.
وعرف الشوط الأول استحواذ من المنتخب البرتغالي على الكرة، فالوقت اللي رجع المنتخب الوطني المغربي للوراء ودار لبلوك وكيعتمد على لكونتر أتاك، مع العلم الفرص كانت متكافئة ما بين المنتخبين وقليلة حيث اللعب مسدود، وانتظر المنتخب الوطني اللحظات الأخيرة من الجولة الأولى باش يخطف هدف التقدم بواسطة القناص يوسف النصيري اللي تهز وفاجأ البرتغالييت وحط الكرة فالمرمى ديالهم، وحاولت البرتغال ترجع ولكن تسديدة برونو فيرنانديز ربت فالعارضة وخرجات ومن بعدها كان يحيى عطية الله قريب يزيد الهدف الثاني للمغرب ولكن ضرب الكرة بعيد.
وفالشوط الثاني بدا المنتخب البرتغالي كيضغط من البداية وكيبحث على هدف التعادل والمدرب ديالو فيرناندو سانتوس دخل كريستيانو رونالدو وعناصر أخرى، فالوقت اللي دخل الناخب الوطني وليد الركراكي كل من أشرف داري فبلاصة غانم سايس اللي توعت، ودخل بدر بانون باش يتكلف برونالدو وخرج سليم أملاح، ودخل وليد شديرة بلاصة يوسف النصيري، ومن بعدها توعت حكيم زياش ودخل بلاصتو يحيى جبران، وخرج سفيان بوفال ودخل زكرياء أبوخلال باش يحاول يخلي الكرة لأكثر وقت عن المنتخب الوطني المغربي حيث كانت كتضيع منو بسرعة قدام الضغط الكبير ديال البرتغاليين اللي غادي يسدد منهم برونو فيرنانديز كرة قوية وصدها ياسين بونو بطريقة واعرة، وظل الماتش كيفما هو وبقاو البرتغاليين ضاغطين والمغاربة كيدافعو ومقاتلين بنقص عددي من بعدما تطرد وليد شديرة وقدرو يحافظو على النتيجة ب 10 اللعابا حتى سالا الماتش بنتيجة واحد لزيرو.
وبهاد الرباح تأهل المنتخب الوطني المغربي لأول مرة فتاريخو لنصف نهائي كأس العالم، وهو اول منتخب إفريقي وعربي كيوصل لهاد الدور فالتاريخ، وأول منتخب من خارج أوروبا وأمريكا الجنوبية كيبلغ نصف نهائي كوب ديموند منذ إنجاز كوريا الجنوبية فمونديال 2022، وغادي ينتظر المغرب المتأهل من الربع النهائي الآخر ما بين فرنسا وانجلترا باش يعرف الخصم ديالو لنصف النهائي، فالوقت اللي الحلم ديال كريستيانو رونالدو والبرتغال تبخر فالتأهل لنصف نهائي كأس العالم للمرة الثانية ويعادل إنجاز 2006.