فرنسا بدات كتوجد للمغرب.. محتافلين وناشطين وهاش دار مع 2 لعابا فمنتخبهم

بدا المنتخب الفرنسي بطل العالم 2 المرات كيوجد لنصف نهائي كأس العالم قطر 2022، واللي غادي يلعبو الأربعاء الجاي ضد المنتخب المغربي من بعدما ربح الننكليز فربع نهائي البطولة.
ودار المنتخب الفرنسي عشية اليوم الأحد، الحصة التدريبية الأولى من بعد ماتش ثمن النهائي اللي ربح فيه البارح منتخب الننكليز بنتيجة 2 لواحد، وقسم مدرب فرنسا ديديي ديشان المنتخب الفرنسي على 2، الرسميين بوحدهم والاحتياطيين بوحدهم، وكان كلشي حاضر وتدربو اللعابا اللي لعبو البارح بشكل خفيف.
ودازت الحصة التدريبية فأجواء حماسية احتفالية، حيث اللعابا ناشطين بالتأهل لنصف نهائي المونديال، وحتافلو هم وجميع مكونات المنتخب الفرنسي ومعهم المدرب ديديي ديشان ومسؤولين من الاتحاد الفرنسي لكرة القدم بحارس المرمى هوكو لوريس وكرموه حيث صبح أكثر لعاب فرنسا لعب مباريات المنتخب الفرنسي وحمل القميص ديالو فليماتش، واللي وصل من بعدما لعب ضد الننكليز فربع نهائي كأس العالم البارح، وأيضا احتفلو بانطوان كريزمان وكرموه اللي صبح هو أحسن ممرر فتاريخ المنتخب الفرنسي بعدد تمريرات حاسمة كيبلغ 28 تمريرة حاسمة.
وغادي يلعب منتخب الفرنسي ضد المنتخب الوطني المغربي يوم الأربعاء الجاي، فنصف نهائي كأس العالم قطر 2022، وغادي يتلعب الماتش فتيران البيت فالعاصمة القطرية الدوحة، مع 8 ديال لعشية بتوقيت المغرب.