واش الفيفا ما بغاتش المغرب يتوج فكأس العالم؟ .. حكيمي حيح مزيان على إنفانتينو وتفاصيل جديدة على شنو وقع

زاد تأكد أن الدولي المغربي أشرف حكيمي صعد فطريقة الحديث ديالو مع رئيس الاتحاد الدولي جياني إنفانتينو من بعدما خسر المنتخب الوطني المغربي البارح ماتش ترتيب الحصول على المركز الثالث فكأس العالم قطر 2022، أمام منتخب كرواتيا وقبل منها الهزيمة أمام فرنسا فدومي فينال البطولة، وهما 2 ماتشات اللي كيشوفهم حكيمي كجميع المغاربة أن المنتخب الوطني المغربي تعرض فيهم لظلم تحكيمي.
وحسب تقرير ديال RMC الفرنسية، اللي نقلت عن مجموعة من الصحافيين اللي كانوا حاضرين فممر تيران حمد الدولي من بعدما سالا ماتش المغرب وكرواتيا، فبالفعل أشرف حكيمي تفركع غضبا على رئيس الاتحاد الدولي لكرة القدم الفيفا جياني إنفانتينو بسبب التحكيم وحيح عليه مزيان لدرجة أن المسؤولين فالملعب طلبو من الصحافيين اللي كانوا حاضرين فالواقعة يمسحو شيحاجة إلى كانوا صوروها من حوار النجم المغربي مع مول البالون فالعالم وتأكدو بالفعل أنهم ما صورو والو.
نفس المصدر كشف أن أشرف حكيمي دار فالسويسري جياني إنفتينو بسبب التحكيم من ماتش دومي فينال ما بين المغرب وفرنسا والظلم اللي تعرض ليه المنتخب من هاديك المباراة حتى ماتش الترتيب البارح ضد كرواتيا وقال له: "هذا الماتش الثاني اللي كيوقع فيه ضدنا هادشي، فين كاين الغلط ؟ الإتحاد الدولي لكرة القدم الفيفا ما باغيش المغرب يربح الميدالية".
للاشارة فكان الدولي المغربي عبر على الاعتذار ديالو لرئيس الإتحاد الدولي لكرة القدم "الفيفا" جياني إنفانتينو، من بعدما انتشر خبر أنه حيح عليه ملي سالا ماتش الترتيب ما بين المنتخب الوطني المغربي وكرواتيا فكأس العالم قطر 2022 البارح السبت، بسبب ظلم التحكيم فحق ليكيب ناسيونال.
وقال النجم المغربي أشرف حكيمي فتصريح لقناة "الرياضية" المغربية وهو كيعتذر: " ما وقع والو كنت غاضب من بعد الماتش مشيت تكلمت معه ونقوله سمح ليا على داكشي اللي قلت له هو راه صاحبي وما طرا والو".