الركراكي: إنجاز المنتخب فكأس العالم 2022 هو ملحمة ملك وشعب

عبر الناخب الوطني وليد الركراكي على الفرحة ديالو بالاستقبال اللي حظى به هو ومكونات المنتخب الوطني المغربي من الملك محمد السادس الشعب المغربي، وأكد أن انحاز ليكيب ناسيونال فكوب ديموند 2022، هو نتيجة ملحمة ملك وشعب.
وفتح وليد الركراكي القلب ديالو وقال فحوار على قناة الرياضية المغربية: "كنشكر الملك، راه فرحة كبيرة بش يستقبلك سيدنا مع الفريق فالقصر وهاد الشعب اللي فرحان وماكناش كنحلمو بهادشي، كنشكر سيدنا على هادشي ليدار على الكرة المغربية واللي كيدير على البلاد، عطانا مورال كبير فكوب ديموند ملي خرج للشارع مع الشعب يفرح فالماتشات، وملي كان كيعطي لنا يموتيفينا وهادي فرحة ماكناش نحملو بها، وكلشي الشعب تجمع باش نحققو هاد الانجاز وخصوصا اللاعبين اللي عطاو كلشي فالتيران".
وكمل وليد الركراكي وقال: "الاستقبال اللي دار لنا الجمهور المغربي كيأكد أن الشعب كيبغي المنتخب وكيبغي بلادو وهادشي وصلناه للعابا ملي كانوا كيلعبو كنوصيوهم يفكرو فالشعب والجمهور اللي تابعنا باش يعطيوه مجهودهم كامل وتقاتلو ما نساوش الجمهور اللي تبعنا لقطر حيث التيرانات كانو ديما عامرين والخدمة اللي دارت الجامعة الملكية المغربية باش يجي الجمهور يعاونا وهادشي مانيفيك، عشنا شهر اللي ما غاديش يتنسا".