قضية امتحان المحاماة.. وهبي رفض يدير المكتب السياسي للبام وطالب بتأجيلو ومصدر مقرب منو ل"كود": العدل والإحسان دخلت فالخط وبغات تصفي حساباتها مع الدولة على ظهر الامتحان

علمت "كود" من مصدر مطلع أن عبد اللطيف وهبي، الأمين العام لحزب الأصالة والمعاصرة، رفض يدير المكتب السياسي الأسبوع اللي فات على قضية امتحان مهنة المحاماة.
وأكد مصدر قيادي فالبام ل"كود" أن وهبي فضل يأجل المكتب السياسي حتى تبان الخيوط كاملة ديال الحملة لي تدارت عليه فمواقع التواصل الاجتماعي، واش كاين طرف سياسي موراها وشكون كيحرض ضد الثقة فالمؤسسات، حسب تعبيره.
دبا لي كاين، حسب ذات المصدر، هو أن وهبي رمى بالكرة فملعب العدل والإحسان، وكيتهمها بالتحريض ضدو، وبأنهم لاحو بلاغ البارح ديال الوقفة قبالت المحكمة الابتدائية بكازا باش تكون اليوم الاحد، وموراها دارو بيان باسم شبيبة الجماعة.
هاد القضية، لي فيها الصراع بين وهبي والعدل الإحسان، فيها بزاف ديال الصراع حول القيم والمرجعية المتعلقة بمشروع القانون الجنائي لي فيه قوانين كتنتصر للحريات الفردية وللمرأة.
وهبي كيوجد مرافعة فالاجتماع الجاي ديال المكتب السياسي، باش يوضح ليهم علاش تدارت عليه هاد الحملة، وبأن العدل والإحسان استغلت الجدل لي على امتحان المحاماة باش تصفي حساباتها مع الدولة، وفق تعبير المصدر القيادي فالبام.
وشدد المصدر نفسه، أن أعضاء المكتب السياسي فالبام تاصلو بوهبي، لي كان متأثر بزاف بالحملة لي دارت عليه ولي أحيانا خدات مسار عائلي وتشويه سمعة أفراد من عائلته.
ماشي غير هادشي، وهبي غاياخد معه فيديوهات ومنشورات تعود لصفحات جزائرية وحسابات وهمية دخلت فهاد الخط باش تشوه سمعة المغرب، ماشي سمعة وزير فقط.