الرجاء مازال ما وصلوهش فلوس صفقة انتقال مالانغو

مازال ما توصل فريق الرجاء الرياضي بحتى ريال من نسبة انتقال اللاعب السابق ديالو بين مالانغو من فريق الشارقة الإماراتي إلى قطر قطري، فالوقت اللي كيعيش فيه النادي أزمة مالية خانقة كتخلي أي ريال مهم بالنسبة للخزينة ديالو اللي ما بقاتش قادرة تغطي شي حاجة من غير ليصالير اللاعبين والمستخدمين وليبريم ديالهم.
وعكس ما تم الترويج له مؤخرا، على أن الرجاء الرياضي توصل بمبلغ 500 مليون، من نسبة انتقال اللاعب السابق ديالو بين مالانغو من الشارقة الإماراتي إلى قطر القطري، فالفريق الأخضر حسب ما كشف عليه عزيز البدراوي رئيس النادي فأنستغرام، مازال ما توصل بوالو من قيمة انتقال مالونغو، حيث أصلا وحسب ما قال، فالفريق الإماراتي حتى هو باقي ما توصل بحتى ريال من الصفقة.
وكيمر الرجاء الرياضي من مرحلة صعبة بزاف، حيث الفريق ممنوع من الانتدابات ومحتاج لمبلغ 580 مليون، باش يحل مشاكل النزاعات اللي عليه ويرفع عليه المنع، خصوصا وأنه محتاج يسني مع لاعبين جداد، واللي حتى هم غادي يتطلب التعاقد معهم الملايين ديال لفلوس.